MSL XI inbuatsaihna vawrtawp a thleng mek Zarkawt BCA captain Matthew Sailo – Last Dance!
MSL XI inbuatsaihna vawrtawp a thleng mek
Zarkawt BCA captain
Matthew Sailo – Last Dance!
Mizoram Basketball Association (MBBA) buatsaih Mizoram Super League (MSL) inbuatsaihna a kal vung hle a, he inelna buaipuitu lam MBBA pawhin a enkawl Hawla Indoor Stadium lama MSL XI chawlhkar hmasa ber (March ni 3 atanga ni 11) thleng turin thapui a chhuah mek. Hemi hnu hian R. Dengthuama Indoor Stadium lamah inelna hi neih chhunzawm a ni ang.
MBBA hian MSL XI hi a la thutak hle a, he pawl puipa thenkhat phei hi chuan inkhelhna tlak satliah mai ni lovin Hawla Indoor Stadium hmelhmang tha thei ang bera chhuah tumin a hmunah hnathawktu te vil chilhin tan an la mek. Basketball court piah lama home & away room leh chinfel ngai zawng zawngte siam thar hna thawkin MBBA in heti taka tan a khawh hi fakna ban pharin ring takin kut kan beng e.
The Aizawl Post Hoops Mania pawhin kil khat atangin tang takin MSL a vil nasat zual hun kan lo thleng leh ta reng a, duhkhawp loh lai leh fak tlak lai te tarlan kawngah MSL X bîkah khan tum 43 zet râwl kan chhuah a, tualchhung basketball che vel chhehvel hi tapchhak atanga lo ngaichang mai lovin hnai thei ang berah kan din chilh ngar ngar. Kumin ah pawh hian phochhuah hreh leh thelh, he MSL XI ah ngei hian nei zui lo turin kan kiu leh ham ham dawn e.
Mizo zinga basketball captain ropui ber Matthew Sailo a chawl hnai!
MSL champion hlut zia chu mi tam takin Mizoram leilunga ke nghat tawh zinga basketball thiam bera an chhal, Ronald March meuh pawh khan tum khat bâk MSL champion team-ah a tel phâk lo – a telna Vikings team ngei pawh a thamral ta der!
Chutiang thawnthu lungkuai karah chuan tualchhung vâl MSL chawi miah lova basketball court-a hniak hnutchhiah tam zia hi – sawi zui lo zawk ang!
Player tha an awm a, tha bik an awm cheu. Basketball khelmuala hruaitu nih tlin leh tling, huikhawmtu tha leh zah kai, hnam dang palian leh hrawl zawkte pawhin an chhuk en ngai loh, MSL vawi 6 zet champion Zarkawt BCA banpui Matthew Sailo basketball zin kawng a tawp hnai ta!
Mizorama hmun hmingthang – Reiek, Phawngpui, |amdil leh adt. tourist hovin hahipa tlawh a manhla zia an tarlan chuai chuai lai hian; Mizoram basketball ngaihventute chuan Zarkawt vâl fit 6 leh inchi 5 zet inkhel en nihlawhthlak zia hi MSL XI tawp rual hian kan sawi theih hmel ta tlat! A ni, he gentle giant inkhel hi tun MSL bâk hi kan hmu tawh lo maithei – MSL XI hian hluttu a ngah zual theihna a sang hle.
Zarkawt BCA tan bul tanin, he club-ah hian a hunpum a hlan dawn tih a chiang ta.
Captain, han tang leh teh khai!