MSME Technology Centre din sawidun

New Delhi-a cham mek Labour, Employment, Skill Development & Entrepreneurship minister Lalnghinglova Hmar chuan Ningani zan khan Union minister for Micro, Small & Medium Enterprises (MSME) Jatin Ram Manjhi a kawm a, MSME kaltlanga Mizo thalaite hmasawnna tur a sawipui.
LESDE minister chuan Mizorama enterprise tam zawk chu MSME hnuai an ni a, Mizo thalai engemawzatin eizawnna atan an hmang tih a sawi a. Mizoram chu mihring awm zat atanga chhuta thalai hnathawk rual tamna, MSME lama nasa zawka tan lakna tlak a ni, tiin, Mizoram sawrkar flagship policy ‘Bana Kaih Scheme’ hnuaiah pawh MSME kaihhnawih hmalakna tamtak a tel tih a sawi a ni.
Skill development lama hmunpui tur, Mizorama ‘MSME Technology Centre’ din chungchang sawi a ni a. State sawrkar atanga thehluh thil tul tihfel hunah hma a lo lakpui tur thu MSME minister hian a hrilh a. Thalaite tana Mizoram sawrkar hmalakna lawmawm a tih thu sawiin, Ministry of MSME atanga puih theihna a awm chuan a inhawng reng tih a sawi.
Tourism minister ni bawk Lalnghinglova Hmar hian Ministry of Tourism additional secretary Suman Billa chu Mizorama tourism project kalpui mek leh project thar thehluh tur an sawi a. State pawn atanga tourist lokalte hun rei zawk cham a, hmun tam zawk an tlawh theihnana hmalak dan tur an sawi dun.
Sports & Youth Services minister Lalnghinglova Hmar hian Zirtawpni khan Ministry of Minority Affairs joint secretary Shyama Prashad Roy leh official dangte pawh kawmin, MoMA hnuaia Mizorama sports project hrang hrang dinhmun an thlirho. Chak zawka hna thawh a nih theihnan ministry leh state department-a hmabak awmte sawihoin, a tul angin hma an la nghal a ni.
India Tourism Development Corporation chairman Mugdha Sinna nen tourism lama hmasawnna tur a sawipui bakah Ministry of Sports & Youth Affairs joint secretary Vineel Krishna nen sports hmasawnna tur an sawi bawk.