A vawi khat nan Modi-a’n New Zealand tlawh dawn

New Zealand Prime Minister Christopher Luxon-a chuan Zirtawpni khan Prime Minister Narendra Modi-a’n a vawi khat nan karleh hian New Zealand a tlawh dawn tih a puang.
Luxon-a chuan New Zealand-India Free Trade Agreement (FTA) hmangin ram pahnihte inlaichinna chu sang zawkah hruai a ni dawn tih a sawi.
X-ah, “Indian Prime Minister Narendra Modi-a’n karleh hian New Zealand a tlawh hmasak ber tur thu ka puang thei hi ka lawm hle a. India hi khawvela economy lian leh chak ber pawl a ni a, New Zealand economy hausakna atana pawimawh tak ram a ni bawk a. April thlaa New Zealand-India FTA kan ziah tawh hmangin ram pahnihte inlaichinna hi a sang zawkah kan hruai mek a, hei hian thil tam zawk a thlen dawn a. Hnathawhna tur, thil thawn chhuah tam zawk leh New Zealand tan economy thanna chak zawk a awm,” a ti.
May 6 khan New Zealand Trade & Investment Minister Todd McClay-a chuan ram pahnihte hian FTA an siam tawh avangin India leh New Zealand inkara insumdawn tawnna chu kum tlem te chhungin a let hniha a pun tur thu a lo sawi tawh.
ANI hnenah minister chuan FTA hian New Zealand-a consumer-te, thil leh service tha zawngtute a huam tih a sawi a, hei hi India-ah awlsam taka hmuh theih a nih thu a sawi a. New Zealand sorkar chuan kum 15 chhungin India-a investment a tih chu USD tluklehdingawn 20 kaitir a tum tih a sawi.
April, 2026 khan India leh New Zealand hian FTA an ziah thu an puang a, hei hi ram pahnihte eibara an inkungkaihnaa thil pawimawh a ni a. Thil zawrhna, thlai thar, investment, thiamna hai chhuah, sports-a thawhhona, tourism leh mihring inpawhna a huam a. FTA hi ram pahniha thil siamtu, lo neitu, MSME, hmeichhe entrepreneur, zirlai leh professional thiam tak takte hlawkna tur atana ruahman a ni.