MSSA-ah hmeichhia tam zawk vangin CS a lawm

Mizoram Secretariat Service-ah mipa aia hmeichhia an tam chu thil lawmawm tak a ni tih chief secretary Dr Renu Sharma chuan a sawi.
Mizoram Secretariat Service Association (MSSA) chuan Ningani khan Aizawlah general conference an hmang a. Hmanpuitu chief secretary chuan group A organised service lian ber an ni leh an service member-ah mipa aia hmeichhia an tam chu thil lawmawm tak a ni tih a sawi a. Ministry kal zelna turah an pawimawh hle, tiin, sawrkar inrelbawlna tha a awm theih nan tha leh zung an thawh tawhnaah lawmthu a hrilh.
Sawrkar inrelbawlnaah mawhphurhna hrang hrang, a bikin office procedures, finance leh administration lama an hnathawh chhinchhiah tlak a ni, tiin, sawrkar hmalakna felfai tak leh a nihna ang taka kalpui a ni thin angin theihtawpa sawrkar thawhpui zel turin a chah a. Communication skills tipung a, an hnathawhsak mipui rawngbawlna kawngah leh midang biakbiak kawngah hma sawn tum zel turin a chah bawk.
MSSA motto “Midangte tana rawngbawl” a nih angin tumah kalkan loa, rualkhai taka hmasawnna a awm zel theih nana theihtawp chhuah turin a chah a ni.
Conference-a report danin, tunah hian MSSA hnuaiah sanctioned post 259 atangin officer 258 an awm a. Kumin chhungin member thar 13 an awm a ni.