Mualneitu India sawpin Syria kutah Intercontinental Cup title a lut

Mualneitu Indian football team hnehin Arab team Syrian chuan Thawhtanni khan Hyderabad-ah Intercontinental Cup title an hlawhhchuak a, a tumthumna atana he trophy lak tum India beiseina an titawp.
Ram pathum inelna Intercontinental Cup league match hnuhnungberah Syria hian sithum faiin India an sawp a; GMC Balayogi Athletics Stadium-a goal hmahruai hi minute sarihna leka Mahmoud Al Aswad thun niin, second half laihawl minute 77-ah Daleho Mohsen Irandust chuan mikhual team tan khungbelhin, hun pekbelhah Pablo Sabbag chuan chiang lehzuala mualneitu team tlawmna goal a thawh ve leh.
Head coach an ban tak Igor Stimac thlaka kumin July thlaa India manager hna thawk tan Manolo Marquez-a hniaia India tournament khelh vawikhatna chu hlimawm loh zetin a tawp ta a ni!
He tournament hi round-robin format hmanga khelh niin, league stage khelh zawha point hmu sang ber chu champion an ni.
Syria hian an bultanna inkhelah sihnih faiin Mauritius an hneh a, point ruk hmuin round-robin league an khar.
India leh Mauritius chu September ni 3 khan goal awm loin an inhnehtawk a, point khat ve ve an hmu.
India kutah he title hi kum 2018 leh 2023 khan a lo lut ve tawh a; kum 2019-a pathumna West Asian team Syria tan he trophy an hawn vawikhatna a ni thung.
Syria hian India leilungah tournament an rawn khel fo a, tun hi an champion vawikhatna niin, kum 2007 leh 2009 Nehru Cup final-ah India ngam loin an tlawm ve ve a, kum 2012 khan palina an ni.
India rama 2019 Intercontinental Cup an rawn khelh tumin Syria hi pathumna an ni tawh bawk a, tah khan India nen 1-1-in an inhnehtawk.
Tuntum hma chiaha India leh Syria intum hnuhnunber chu kumin January thla Qatar rama Asian Cup-ah niin, sikhat faiin Syria an chak a, India leilungah erawh chiang zawkin Thawhtanni khan Apuia, Lianzuala Chhangte leh substitute Edmund Lalrindika telna mualneitu team an hneh.