Mualthuam North tleirawl thattu nia insawi police hmaah inpuang

Lunglei district Mualthuam North khuaa tleirawl H Lalramdinpuii (15) thihnaa mawhphurtu nia insawi mi pahnih chu police hmaah an inpuang a. Thu zawhfiah zui zel an ni dawn.
Kumin August 3 zan dar 8.30 vela a chin hriat zui tak loh H Lalramdinpuii (15) d/o H Lalawmpuia, Mualthuam North chu a chhungte leh khawtlangin an zawn hnu ah August 5 2026 zing dar 10.20 vel khan Mualthuam North Govt. Middle School compound-ah thia hmuh a ni.
MI kut tuar a ni tih a lan avangin Lunglei Police-in Special Investigation Team (SIT) a din a. Mualthuam North hi thutchilhin an chhuizui a, kar khat vel an thutchilh hnu ah Lunglei lamah chhuahsanin an chhuizui zel tho a. Thu zawhfiah nei nualin, rinhlelh thil thua kawl rei pawh an nei a ni.
August 20 khan H Lalramdinpuii thihnaa pawikhawihtu nia insawi mi pahnih – Denghmingthanga (20) leh Lalneihkima (34), Mualthuam North ve ve chu Lunglei Police hmaah an inpuang tih sawi a ni.
Mizoram Police thuchhuah siam danin, Denghmingthanga leh Lalneihkima hi vawi tam thu zawhfiah turin koh an ni tawh a. An phone hman dan (digital evidence) leh forensic evidence atanga rinhlelhna awm chu an chik chho zel a, heng finfiahna leh zawhna chi hrang hrang an hmachhawn hnuah Ningani khan SIT hmaah an inpuang a. An inpuan hnu hian dan ang takin NIngani chawhnu dar 1.00 khan man nghal niin, danin a phut angin judicial custody-a dah nghal an ni.
‘H Lalramdinpuii thah a nih chungchanga thil thlen dan kimchang leh finfiahna (evidence) hrang hrang erawh tun dinhmunah dan kenkawh leh he thubuai chhuizelna tibuai thei tur a nih avangin la tarlan theih a ni rih loa, he tualthahna hi investigation kal lai mek niin finfiahna (evidence) hrang hrang leh kaihhnawih thil la chhuizui zel niin, a tul angin thuchhuah siam zel a ni ang,’ Mizoram Police hian an ti a. Police hnuchhuitute hmalakna ngaichang zel tur leh mahni thua hma la mai lo turin mipui an ngen ti an sawi a ni.
The Aizawl Post-in a zawhchiannaah pawikhawihtu nia insawi zing ami Denghmingthanga hi vanduaina tawk H Lalramdinpuii nen hian an pi leh an pu unau an ni a; an chenna pawh inhnaih tak a ni. Ramdinpuii bo thu hriat a nih atang khan a zawnna leh social media lama thu thehdarh a, hmuh leh thuai duh zawnga thu lungkuai lam dahtu zinga a tel bakah a zawnna lamah pawh thawkchhuak a ni. Heti chung hian, police-in hnu an chhui zui tak tak hnua thu zawhfiah hmasak zingah a tel a, SIT-in Lunglei lama an haw san hnu ah pawh an lak zui zingah a tel tih sawi a ni. Lalneihkima hi Denghmingthanga te thenawm ami a ni thung a, a ni hi August 18 khan Lunglei lama koh a ni.
An thah chhan nia an sawi hi police-in an la puang loa, a tul anga la puan zui zel an tum nia thu dawn a ni.