Mumbai-a Mizoram Guest House satu contractor thlak a ni ang – CM

Kum 2013 atanga Mumbai-a sak tan, Mizoram State Guest House & Emporium satu chu thlak a ni dawn tih chief minister Lalduhoma’n a sawi.
Mumbai-a kal chief minister hian Pathianni chawhnu khan Mumbai Mizoram House tlawhin thawktute leh damlote nen an inkawm a. Navi Mumbai-a kum 2013 a sak tan tawh, vawiin thlenga la zawh loh Mumbai Mizoram State Guest House & Emporium satu tur a thara ngaihtuah a nih tur thu hi a awi. A satu atana thlan US Roofs-in Mizoram sawrkar nena inremna bawhchhiaa muang taka hma a lak avang hian hun hmasa lamah Assembly Committee pawhin a hmunah an tlawh tawh a, sawrkarah rawtna pawh an thlen tih chief minister Lalduhoma chuan a sawi.
Mumbai-a cheng Mizote leh damlo zu kalte pawh an mangang thin hle tih sawiin, “Kum telin Mumbai pantu kan pung zel si a. Sawrkar chuan ngaihtuahna thar sengin Law & Judicial department-in a zirchian hnuah US Roofs nena agreement hi titawp a, tha thara a satu tur zawn ni se, CIDCO-in min pek dan ang tak leh Mizo mipuiin hlawk zawka kan hman tangkai theih tura sak nise kan ti a ni,” a ti.
Agreement tihtawp tura thutlukna hi Mumbai a zin hmaa an siam a nih thu a sawi a ni.
2008 September 2 khan City and Industrial Development Corporation of Maharashtra (CIDCO) chuan plot no.9 sector 30A Vashi (Navi Mumbai) chu Mizoram sawrkar a pe a. A lease period hi kum 90 niin, a ram zau zawng hi square metre 1983.48 a ni. Developer /builder nena hma laa kalpui phawt turin Mizoram sawrkarin a ruahman a. Builder company pakhat US Roofs Ltd. nen 2009 January 30 khan inremna ziah a ni.