Municipal huamchhunga awm Job card nei 14000+ paih dawn

Lunglei khawpui chu Municipal Council hnuaia a awm tak avangin, hemi huamchhunga Lunglei RD Block-a awm, job card nei 14200 vel paih a ni dawn.
Rural Development department hriattirna chhuah angin Lunglei Municipal Council (LMC) hnuaia job card neite tan ni 100 inhlawhna chu kumin April 1 atang khan tihtawp a ni dawn a. A tawp nan kar hmasa lam khan job card neitu, bank-a mapping tite account ah pawisa thun niin, hei hi kumin January – March thla hlawh (Rs.6225) a ni. Mapping ti ve lo te erawhin farewell NREGS hlawh tia sawi, Rs. 6225 hi an dawng ve thei loa, BDO office-ah thil awm dan zawtfiahin mi engemawzat chu an buai hle tih sawi a ni.
Mapping hi Aadhar card leh account thlunzawmna niin, Aadhar card neilo leh bank-a thlunzawm ve lo te chuan pawisa hi an dawng ve thei loa, hei hi nikum lam khan office-a thawk te chuan Gram Sabha-ah an sawi thin a, ngaipawimawh an awm laiin ngaipawimawh ve lo leh a nachang hre lote chuan harsatna hi an tawk taah an ngai tih an sawi.
Lunglei RD Block-a job card 18900 atangin LMC huamchhung bikah job card 14200 vel paih an ni a; NREGS hnuaia an sum hmuh thin hlawh, material component leh administrative cost belhkhawm chu a vaiin Rs. 75,54,40000 vel nia chhut a ni.
Thudawn danin ni za inhlawhna chan a ngaih phah avang hian Municipal Council atanga chhuah leh dan ngaihtuah veng pawh an awm tih sawi a ni a. NREGS atanga thawh thin, bawlhhlawh paih ringawt pawh harsatna tawk an awm dawn nia sawi a ni.