Australian Open 2023, ni hnihna chu Thawhleh zing atang khan khelh tan a ni a. World No. 1 hlui Andy Murray chuan hnehna lian sualchhuakin 13th seed Matteo Berrettini a hneh nawlh a, second round a lut. Murray chak rual hian British player Dan Evans a chak bawk. Australian Open khelh tanni khan mipa lamah champion tura rinkai Daniil Medvedev leh Tsitsipas ten hnehna lo chang tawh bawk.
-- Advertisement --
Inlehthalna thlentu Murray
Andy Murray hi a vanglai chuan khawvela tha ber pawl a ni a. A kum rualpui Novak Djokovic nen pawh hian an inel tawk hle thin. Grand Slam ah vawinga a champion tawh a, World No. 1 pawh a lo ni tawh thin. Hliamin a tihbuai nasat vangin inelna a hmachhawn tam thei lova, hnehna lian a chan theih loh vangin ranking ah pawh a tlahniam duai duai. Ranking ah a tlak hniam nasat vangin inelna reng rengah player tha ber ber hmachhawna bul tan a ngai fo a, chu chu atan thlensan harsat chhan a ni. Australian Open 2023 ah ngei pawh hian tunlaia chetha ber ber zinga mi Matteo Berrettini hmachhawn nghal a ngaih vangin second round lut tura rinkai zingah a tel phak lo. Mi tam takin first round ah tla nghal turin ngai bawk mahse Murray chuan inlehthalna lian a thlentir ve ta tlat thung a, harsa takin Berrettini a hneh.
Rinkai lo zawk Murray hian Berrettini lakah beisei phak baka thain bul a tan a, set hmasa pahnihah game thum ve ve chauh hlohin set a la a, awlsam taka chak thei dinhmunah a ding. Set hnih a hloh hnuin Italian Berrettini hian huaisen takin a beilet a, break a neih chhawr tangkai ve ve in, set hnih a la zawn ve leh a, inkhel boruak a nung tha vet vet hle.
Set hnih ve ve an lak hnuin deciding set khelh chhunzawm a ni a, deciding set ah an inhnehtawk zui hle. Berretiini chuan chak theihna hun tha tak a nei a, 5-4 a hma a hruai a, a serve hum se chak mai tur a nih laiin Murray-a’n a break leh hlauh a, tie-break khelh a ngaih phah. Hun pawimawh leh boruak sangah tawnhriat leh record nei tha zawk Murray a chetha zawk a, harsa lutuk lovin set a la nawn leh a. Khingpui hautak Matteo Berrettini chu 6-3 6-3 4-6 6-7 (7-9) 7-6 (10-6) in a hneh a, ropui takin second round a lut.
Tarlan tawh angin Murray hian kum 2019 khan zaipui a tawk a. Hemi hnu hian inelna hmachhawn thei lovin a bawksawp reng. World No. 66 ni chungin Australian a hmachhawn a. Matteo Barrettini a hneh hi kum 2017 hnu lamah Grand Slam a top 20 player a hneh vawikhatna a ni hial nghe nghe.
Andy Murray chak rual hian Bristish player Dan Evans pawhin hnehna a chang ve bawk a. Seed 25 Evans hian a khingpui Facundo Bagnis lakah set khat hloh ve bawk mahse, 6-4 4-6 6-4 6-4 a hnehna changin second round a lut.
Alexander Zverev a kir, a chak nghal
Khup hliamin a tihbuai vanga chawl reng Alex-ander Zverev hliam a dam a, Australian Open a hmachhawn ve leh thei tawh. Olympic champion Zverev hian Wimbledon leh US Open a hmachhawn theih loh hnuin Australian Open 2023 ah Juan Pablo Varillas a hmachhawn a, 4-6 6-1 5-7 7-6 (7-3) 6-4 a hnehna changin second round a lut.
Melbourne Park a inelna neih mekah hian Thawhlehni khan Andrey Rublev chuan 2020 US Open champion Dominic Thiem chu awlsam takin a hneh a. Thiem hi 6-3 6-4 6-2 a vawtla in, secon round a lut. Thawhlehnia hnehna chang zingah Holger Rune leh Grigor Dimitrov te an tel.
Medvedev leh Tsitsipas an chak
Australian Open 2023 khelh tan ni, thawhtan khan mipa lamah champion tura rinkai zinga mi Danill Medvedev leh Stefanos Tsitsipas te an inlan a, hnehna changin second round an lut ve ve.
Australian Open 2022 finalist Medvedev hian Marcos Giron hmachhawnin bul a tan a, nuamsa fein a chak a. A khingpui hi 6-0 6-1 6-2 ngawtin a sawp a ni. Medvedev hian kum 2022 khan champion theihna hun tha tak a neih a chhawr tangkai zo lova, set hnih a lak hmasak zet hnuin Nadal-a’n a lehthal.
Third seed Stefanos Tsitsipas chuan Quentin Halys hmachhawnin bul a tan ve thung a. France player lakah hian 6-3 6-4 7-6 (8-6) in hnehna a chang a, second round a lut.