Australian Open 2023 khelh mekna Melbourne khua chu tunlai hian khawlum leh ruahsurin a tibuai a, Thawhlehni khan Melbourne Park-a inkhel thenkhat a khaihlak hial.
A bik takin stadium chhung ni lo pawnlera court boruak a tawrhhlelhawm zual a; Thawhlehni, a ni hnihnaah phei kha chuan khawlum lutuk mai bakah ruah tla telin Australian Open match \henkhat a tibuai.
-- Advertisement --
Melbourne khaw lum zawng (temperature) hi a tehnaa 36 degrees Celsius (97F) chung lamte niin, match thenkhat chu chawlh lai-lawktir (heat break) hial a ni.
Darkar thum an chawlh hnuah inkhelh chhunzawmtir leh an ni a, match thenkhat chu khelh zawhtir niin, tlai lamah ruah a rawn thawk ve leh a, Melbourne Park-a pawnler court-te chu a tuar nasa an ni.
Heat break zawh hian Rod Laver Arena chungkhuh hnuaiah world number one hlui Andy Murray leh Matteo Berrettini inkhel tur pawh bul tantir chauh an ni.
Murray-te inkhelh hmaa Cana-dian qualifier Katherine Sebov laka 6-3, 6-0 hnehna chang Frenchwoman Caroline Garcia thung chuan nisa leh khawlumin a tihnep thu sawiin, “Rod Laver Arena hi chu a fuh tlat a, lum ve tho bawk mah se daihlim hnuaia awm na hunte a awm a, a bikin serve dawna hian daihlim hnuaia din lawkna hun a awm thin a, kan inkhelh lai khan khawlum lutuk ka hre lo,” a ti ve thung.
Season liamtaa WTA Finals title changtu fourth seed Garcia hian Canadian dang 2021 US Open finalist Leylah Fernandez a hmachhawn leh dawn a; Leylah hian Alize Cornet lakah Thawhlehni khan 7-5, 6-2 hnehna a chang ve bawk.
Italian Martina Trevisan chu Thawhlehnia seed chang pha zinga tla hmasaber niin, 21st seed hi 6-3, 6-2-in Slovakian qualifier Anna Karolina Schmiedlova chuan a vaw tla.
Fifth seed Aryna Sabalenka pawhin Thawhlehni khawlum hnuaiah first round a paltlang tawh a, straight sets (6-1, 6-4)-a Tereza Martincova hnehin, set hloh loa Adelaide International 1 title la chunga kum bul tan Belarusian hian khawlum thang huam hnuaia inkhelh chu harsa a tih thu inkhelh banah sawiin, hnehna nena bul a tan thei a lawmzia thu a tarlang tel.
Margaret Court Arena leh John Cain Arena lam chu chungkhuh nei an nih avangin nisa a ziaawm hret a, heat break zawhah match chhun-zawmtir an ni hlawm.
Ni sa, daihlim hnuaia bo-ruak awm dan, boruak hnawn lam leh thli chak dan atanga tehna an siam Australian Open heat stress scale an tih chuan Thawhlehni khan level sang ber (level of five) a kawk a, he extreme heat policy an duanchhuah hnuaiah hian level 4 a kai chuan singles player-te tan match khelh laiin minute 10 chawlh pek theih a ni a, intihthlandaihna pindan (cooling room)-a tuivawta inphuh phalsak an ni bawk.
Khawlum vanga inkhel khaihlak zingah hian Britain player Dan Evans pawh telin, Argentina player Facunado Bagnis laka set hniha hma a hruaifal laiin cooling room pan phalsak an ni a, ice pack-te’n an han indep a, court-a a kirleh hnuah Evans hi 6-4 4-6 6-4 6-4-in a chak.
Day 2-ah vek khan hmei-chhe lamah Estonia nula hriat hlawh Anett Kontaveit leh Julia Grabher of Austria inkhel pawh outdoor match 10 khaihlak zingah telin, 1573 Arena a\angin intihdaihna hmun an pan.
Novak Djokovic chuan a record ding lai pawtseia Australian Open title 10-na a beisei kal mekna kawngah tlai lam boruak ziaawm deuh hun a chang a, keini huna nizan, zantir lam khan Carballes Baena lakagh tournament bul a \an a, an result tarlan hman ni lo mah se 2nd round lut ngei tura beisei a ni.
Khawchin zirtute puan lawk danin vawiin, Nilaini hian boruak lum dan a ziaawm hret dawn a, a lum zawng pawh degree 10 vela tlahniam turin an dah.