Union Home Minister Amit Shah chuan ‘Muslim tana reservation chu Constitution kalh a ni’ tiin a sawi. Nanded, Maharashtra-a Bharatya Janata Party(BJP) tena Centre a Prime Minister Narendra Modi sorkar kum kua tin lawmna kalzel an neih pualin rally a nei a. Amit Shah chuan, “Bharatya Janata Party(BJP) te chuan Muslim tena reservation an neih a duh lo, a chhan chu Constitution kalh a ni a. Sakhua behchhanin reservation a awm thei lo,” tiin a sawi.
Tun hnaiah Maharashtra-ah communal hawi zawnga intihbuaina a thleng fo va, chutih laiin a thenawm lawk Karnataka-ah sorkar hmasa JP chuan Muslim te tana quota an thiah bawk vang a ni.
Shiv Sena (UBT) leader Uddhav Thackeray beiin senior BJP leader chuan, “Uddhav Thackeray hian Nanded mipui te hnenah Muslim te tan reservation a awm dawn leh dawn loh sawi chiang rawh se,” tiin a sawi bawk a. Hei bakah hian Chief Minister hlui chu triple talaq leh Ram Madnir, Ayodhya chungchangah zawhna a nei bawk a. “Shiv Sena (UBT) thawhpui Congress te chuan history atangin Veer Savarkar hming nawhreh an duh a. Nang hian (Uddhav Thackeray) i pawm em?” tiin Shah chuan a sawi.
Shiv Sena keh darh chungchangah Home Minister chuan Thackeray chu kap zauh bawkin, “Shiv Sainiks ten chhuahsan chein min lo pan a, a chhan chu i politics leh ideology an duh lo. Tute nge Shiv Sena tak tak te kan hria a, ‘bow and arrow’ symbol an chang ngei bawk,” tiin a sawi.
Nanded hi senior Congress leader leh Maharashtra Chief Minister hlui Ashok Chavan home turf a ni bawk a. Nanded-a rally a neihnaah hian Shah chuan Congress leader Rahul Gandhi a bei bawk a.
Tun hnai lawkah Congress leader Rahul Gandhi an United States tlawha thusawina hrang hrang a neihah India ram chhung politics sawiin ram dangah India a sawisel tiin a sawi bawk a.
“Rahul Gandhi hian ram pawnah kalin ram chhungah tumah amah ngaithlatu an awm loh avngin ram pawnah sorkar a sawisel thin. Modi erawh khawvel khawi hmunah pawh kal se mipui ten an lawm em em,” tiin a sawi bawk a.
“Modi chu India pride a ni a, kan PM avang hian India chuan kawng tinrengin hmasawnna a hmu a ni,” tiin a sawi bawk.
-- Advertisement --
Shiv Sena ten chhang let
Shiv Sena (UBT) Rajya Sabha MP Sanjay Raut chuan Bharatiya Janata Party te chuan a party Uddhav Thackeray kaihhruai chu ‘an hlau’ tia sawiin chu chu thil lawmawm a ni a ti bawk.
A hmain Amit Shah chuan Thackeray-a’n BJP te nena an inzawmna chhu chhiaa Nationalist Congress Party leh Congress te nena Maha Vikas Aghadi sorkar a din chu thuneihna duh vang liau liau tiina lo sawisel tawh thung a.
Sajay Raut chuan, “BJP tena Uddhav Thackeray an hlau hi thil lawmawm a ni. Shiv Sena party tipheltute an ni a, phatsantute hnenah a hming leh symbol an pe zui bawk a, Uddhav Thackeray leh Shiv Sena (original) an hlauhna chu a la reh thei lo,” a ti bawk a.
“Amit Shah-a’n thusawi nan minute 20 a hmang a, chuta minute sarih chu Uddhav Thackeray chungchang sawi nan a hmang a. Nanded-a rally an neih kha Maha Sampark Abhiyan chungchang nge BJP tena Thackeray sawisel nana an rally zawk le,” tiin a sawi bawk a. BJP te hian Uddhav Thackeray-an zawhna a pekte chhang mai se, enenfihna nei mai rawh se, anmahni thangkamah an awk mek a ni, tiin Raut chuan a sawi bawk.
Maharashtra-ah hian Maha Vikas Aghadi a tlukchhiat hnuah Shiv Sena leder Eknath Shinde chuan BJP te thurualpuiin sorkar-na a siam a. Shinde chuan Chief Minister nihna chelh mekin BJP leader Devendra Fadnavis chuan Deputy Chief Minister nihna a chelh thung a, Fadnavis hi a hma pawhin BJP chief minister lo ni reng tawh a ni bawk.