Muster roll dinhmun siamthat kan ngaipawimawh – Dy CM

Muster roll dinhmun siamthat
kan ngaipawimawh – Dy CM
Mizoram sawrkar chuan muster roll-te dinhmun siamthat an ngaipawimawh a, theih ang angin an hamthatna tur an duang mek zel tih deputy chief minister Tawnluia chuan a sawi.
A department chan hrang hranga hmasawnna hnathawh tarlanna lehkhabu siam a tlangzarhnaah deputy chief minister chuan, DP&AR hnuaiah sawrkarin a kul a taia a hman muster roll-te chu an hna atanga an ‘mai par thlawn’ tawp zel chu tha ti loin, an service chungchang enpui turin a kaihhnawih official-te a sawipui a, ‘provisional employee’ tia letin, an regularise-na tur percentage an siam a, a tahtawlin an dah nghet ve ta tih a sawi. Medical facility an chan theihna tur te, hlawh 4% a pung zela siamsak tum an nih thu leh, leave siamsak an nih thu te a sawi.
“Hetiang kan siam thei ta hian ka rilru a ti hlim. An thawkrim em em a, an hlawh lah fix sa a awm a, tunah chuan kumtina pun ve dan tur te duan a ni. A tir atanga tih ni lo ta chu chinfel erawh a har hle,” a ti.chu
Hei bakah hian MPSC hna rit lutuk chhawk then turin Mizoram Subordinate Services Selection Board (MSSSB) an siam thar tak thu te, Mizoram Civil Service-a indaih loh nasa lutuk phuhruk tur leh, state service-te tuaihriam turin Administrative Training Institute an tihchangtlun dan te a sawi bawk.
Mitinten tui thianghlim hman tur an neih theihna’n project hrang hrang PHE department hnuaia hma an lak thu pawh Tawnluia hian a sawi a. Chutihrualin tui hna kang zel veng a, tipung tura hma lak a ngaih thu te a sawi. UD&PA hnuaiah khawpui lian leh tenau zawkte hmasawnna tur nasa taka hma lak a nih thu a sawi a ni.