MWBA inelna zo Clutch Gene-in champion nomawi chawi

MWBA inelna zo
Clutch Gene-in champion nomawi chawi
I-Day denchhena August ni 15, 2025-a Mizoram Women’s Basketball Alliance (MWBA) leh a thawhpuite tournament buatsaih tak chu a hmawrbawkna zan lamah neih nghal a ni a, final-ah Team Clutch Gene leh Team JJJ ten inkhel hmuhnawm tang tak chhawpchhuakin, Clutch Gene lamin 27-25-a Team JJJ hnehin team paruk zinga thiam ber an ni.
He inelna hi Mission Vengthlang Basketball Indoor Stadium-ah neih a ni a, player 48 zet inlanin, hmeichhe basketball ngainaten inelna karah he intihsiakna hmang hian thawhhona tha zawk an phochhuakin a lang.
MBBA hnuaiah hian hmeichhe club hi tun season-ah hian pali an awm a, season tin deuhthaw hmeichhe club hi chu an che reng, duthusamin hmeichhe baller-te tan mipa angin thang chak tawh lo mah se, an kal kawng sial saktu mi thahnemngai an awm thin hian boruak a tinung ve reng.
Tun dinhmunah chuan hmasawnna tur tam tak karah MWA lamin anmahni pualin inelna an buatsaih thei ta hial!
Mizoram Basketball Association (MBBA) hi kum 1984 khan a ding tan a, mumal taka club din tur erawhin kum 11 zet nghah a ngai.
Kum 1995 khan Zarkawt Falcons-in basketball club an din hnuah anni bawk hian hmeichhe team hi kum 1996 khan an nei zui ve nghal – vawiina kan thlen chin mipa lam chuan India a nghawr a, hmeichhe lam erawh hi chu a than a thu tih a lang!