Chin National Army (CNA) hmunpui Camp Victoria beih a nih hnuah Myanmar atangin Mizoramah raltlan lut thar an la awm reng a, an luhna ber Farkawn-ah chuan Chawlhni pawh khan chhinchhiah thar an la awm.
-- Advertisement --
Camp Victoria hi Myanmar sipaite’n January ni 10 leh ni 11 khan indo thlawhna hmangin an bei a, hemi hnu hian a bul vel khua atangin mi engemaw zat Mizoramah an tlanchhia a ni. Farkawn, Vaphai, Khankawn leh Thekte velah an tlanchhia a, Camp Victoria hnaiha awm Farkawn chu an tam berna a ni.
Village Level Committee on Myanmar Refugee, Farkawn hruaitute chuan Chawlhni pawh khan raltlan lut thar chhungkaw pahnih an in-report thu The Aizawl Post an hrilh a, ni tin deuh thaw lut thar an la awm thu te, mahse tam thama lut chu an ni tak rih loh thu te an sawi.
February ni 5 thleng khan raltlan hi chhungkaw 97, member 355 an chhinchhiah tawh a, raltlan lo awm sate an bel tlangpui. Mahni-a in luah hrang chu chhungkaw 10 vel bak an ni lo tih an sawi.
An chhinchhiah danin, January ni 10 leh ni 11-a Camp Victoria beih a nih hnuah January ni 13 atangin raltlan lut thar hi an awm tan a, a tir lamah chuan a hlawm lian thamin an lut. Tunah chuan a huhova tam thamin an lut tawh lo a, mahse ni tin deuh thaw an la awm belh.
Village Level Committee on Myanmar Refugee hruaitute sawi danin, Farkawn-ah hian raltlan hi chhungkaw 184 vel an lo awm sa a, inhlawhna awm ang angah te inhlawhin a rem rem an thawk a, a tir lam anga puih ngai pawh an ni tawh lo. Mahse tunah a lut tharte’n an han belh takah hian an harsa leh ta deuh a, ei leh in lamah a hma ang an ni ta lo deuh.