Sawrkar laipuiin kuthnathawktu tana chhawmdawlna a ruahmansak, PM-KISAN hnuaiah Lawngtlai district-a inziaklut mi sing 4 chuang chu he scheme-in a huam theih loh tur an ni dawn a, a huam theih tur mi sing hnih chuang an awm thung.
-- Advertisement --
Lawngtlai District Level Grievances Redressal and Monitoring Committee (DLGR&MC) under PM-KISAN chu an chairman, district bawrhsap Amol Srivastava hoin an thukhawm a. PM-KISAN hnuaia inziaklut thei lo zing ami, sawrkar hnathawk leh pensioner-te zinga inziaklut leh chhungkaw khat atanga mi pakhat aia tam inziaklut, mitthi leh chhan dang vanga paih ngaite enfiah tura Block Development Officer leh District Agriculture Officer te kuta dah an enfiahna report thlir ho a ni. Beneficiary-te hi a hmuna kalchilha enfiah an ni a; enfiahna (re-verification) report hi DLGR&MC chuan pawmpuiin, State Level Committee-ah thehluh nise, tih a ni.
Report-a a landanin, 2023 January 31 thleng khan Lawngtlai district-a block 4-a khaw 176 atangin PM-KISAN hnuaia inziaklut beneficiary 77895 an awm tawh. PM-KISAN guideline anga felfai thlap beneficiary 24306 awmin, mahnia ram nei lo, loneimi (jhummian) 6293 an awm bawk a; jhummian-te hi beneficiary-a telh thei turin dil mek a ni. Hemi huang hniha tel lo beneficiary 47296 awmin, heng zingah hian chhungkaw khat atanga mi pakhat aia tam inziaklut 4933; mahni khua atang niloa inziaklut 39570; sawrkar hnathawk leh pensioner inziaklut 1720, mitthi tawh 879 leh anmahni chhuichhuah theih loh mi 194 an awm a ni.
Sawrkar laipui ruahmannaa kuthnathawktute tanpuina PM-KISAN (Pradhan Mantri Kisan Samman Nidhi) hi kum 2019 atang khan Mizoramah kalpui a ni a. He scheme hnuaia inziaklut kuthnathawktu, ram nei ngeite chu kumtin bank kaltlangin tanpuina Rs. 6000 pek thin an ni.