Myanmar lama dan loa bungraw kal tur la dang

Dan phalna loa Myanmar ram Rakhine state-a Mizoram atanga tuialhthei leh bungrua thawn luh thin chu chhan hrang hrang avangin Central Young Lai Association chuan June 24 atang khan an la chhunzawm zel.
Central YLA hruaitute chuan bungrua lut tur dan hi state sawrkar hriatpui leh thawhhonaa kalpui a ni tih an sawi a. Check post an siamah Mizoram hmun danga kal tur oil phur lirthei dan an nei loa, Myanmar-a lut tura ngaih eichawp phur lirthei thenkhat erawh tangkhang a awm tih an sawi.
Siaha-a tuialhthei dah tur chu an tlangtir zel a, filling Station thenkhat behchhana tuialhthei phur, a dahna tur hmuna dah loa Myanmar ramri lam panpui an awm tawh thin vangin duty an fimkhur hle a, Mizoram mipui ta tur a ni tih hriatchian erawh tangkhang an awm lo tih an sawi a ni.
Central YLA hruaitute chuan, dan loa Rakhine state-a tuialhthei leh thildang thawn luh kawngah sawrkarin a tih tur tha takin hlen se an duh ber tih an sawi a. Sawrkarin a tih tur a tih chuan an ni chuan an tawp san mai dawn tih an sawi.
Thudawn danin, Rakhine state hi Arakan mi tamna a ni a, tunhnaiah Arakan mi hi Lawngtlai leh a chhehvelah tam tak lo lutin an duh ang angin zalen takin sumdawnna an kalpui a ni. Hei bakah hian Myanmar rama tualchhung buaina kal mekah sawrkar sipai beitu Chin mipui sipai chu Arakan hel pawl – Arakan Army chuan an kap thin a, hei hi CYLA chuan a duh lo hle tih sawi a ni.