Myanmar raltlante hman tur biometric enrolment portal siam thar a ni a, hman thuai a ni dawn tih chief minister-in a sawi.
Nilaini khan Central YMA hruaituten chief minister Lalduhoma hi a office-ah an kawm a. Ruihhlo chungchang leh khua leh tui ni lo ten document hrang hrang an neih chungchang an sawiho.
Central YMA hruaitute chuan Mizorama ramdang mi, India khua leh tui ni lo ten khua leh tui dik takte chauhin an neih theih document hrang hrang – Adhaar card, voters ID adt.leh birth certificate neih tuma hma la an awm fo a, nei pawh an awm tih an sawi a. Fimkhur taka kal a tul thu leh Common Service Centre ho pawhin fimkhur taka an kalpui a tul thu an sawi.
Chief minister hian Prime minister leh Union Home minister rawtna angin Myanmar atanga raltlante hman tur biometric enrolment portal siam thar a ni a, hman thuai a ni dawn tih a lo hrilh a ni.
Ruihhlo do kawnga sawrkar, NGO leh kohhrante theihtawp chhuaha tanho a tul thu leh hun hmasa lama sawrkarin chief minister kaihhruaia Committee a din – ‘State Level Core Committee on Ruihhlo Do’ chu din thar leh a tul tih an sawipui a. CM hian ruihhlo do kawnga theihtawpa hma lak a tul tih sawiin, State Level Core Committee hi an thutkhawm thuai theihnan hma a lak tur thu a sawi.
Inner line permit pek chhuah dan phung chu Central YMA hruaitute hian an sawipui bawk a. Sawrkarin ILP Regulation a enthat mek thu leh a pek chhuah danah changtlung zawk, online tracking system kalpui tum a nih thu a lo hrilh a, a tul angin CYMA chu rawtna siam turin a chah nghal.
Chhungkaw tinte chhinchhiahna tur Mizoram Assembly House-in a lo pass tawh, Household Registration chungchangah buaipui ngaite buaipui mek a nih thu leh CYMA hruaitute pawhin lo ngaihven zui zel turin chief minister chuan a chah bawk.
Myanmar raltlan tan biometric enrolment portal hmang hnai
Get real time updates directly on you device, subscribe now.
Next Post