Mizoram thalaite thawh tur chi leh zirna chhunzawmna tur ngaihvenin Mizoram Youth Commission chairman Dr Vanlaltanpuia, MLA chu tunhnai khan England-ah kalin hemi kaihhnawihah mi hrang hrang a kawm.
Foreign-a thawk tur Mizo thalai tam zawkin ‘English test’ an paltlang theihna’n changtlung zawka IELTS (International English Language Testing System) leh OET (Occupational English Test) kalpui a nih theihna’n MYC chairman hian hma la a. IELTS hi Common Wealth rama thawk turte tan a ni a, Mizo thalai tam takin an paltlang tawh. OET hi UK health sector hnuaia thawk turte tan a ni a, Mizo thalai (nurse) 5 an hlawhtling tawh tih a sawi.
United Kingdom-a nurse thawk tur thawnchhuak hnem bertu Swindon London-a ARYAVRAT (Charcos India) company dawrin an English instructor-te a kawm a, English zirna changtlung neih dan tur bakah anmahni (English) ngeiin Mizo thalaite zirtirna an pek theih dan tur a sawipui.
London-ah British sawrkar official pahnih, Department of Health & Social Care-a head of International Workforce Dave Howard leh senior policy advisor for International Workforce Rhian Wells te chu Dr Vanlaltanpuia hian a kawm a. Mizo thalaite tan hnathawh tur awm thei hrang hrang thlirhoin, British sawrkar hnuaia nurse hna tam tak awma Mizo thalaite luh ve theih dan tur an sawi ho.
Pachhunga University College (PUC) leh Royal Holloway University of London thawhdunna tura ruahmanna awm mek chu a bawhzui a. He university-a hotu hrang hrangte kawmin PUC nena thawhdunna tur hmawr an bawk fel a. Hun reiloteah inremna ziah theih beisei a ni.
Heng bakah hian London-a association leh insitution lamin programme an buatsaihah Mizoram thalaite tan hna leh zirna lama bawhzui theih turte a bawhzui tih MYC chairman hian a sawi a ni.
MYC chairman-in England-ah Thalaite hna leh zirna ngaihven
Get real time updates directly on you device, subscribe now.
Prev Post
Next Post