MZU-a Law deptt din sawipui

Law & Judicial minister TJ Lalnuntluanga chuan Mizoram University-a Law department a awm theih dan tur MZU vice chancellor Prof. Debakar Chandra Deka a sawipui
Mizoram University-a Department of Political Science-in “India and G20, Setting a Global Agenda” tih thupui hmanga national seminar neih a hmanpuinaah Law minister hian MZU vice chancellor hi Law Department awm theih dan tur a sawipui a. Vice chancellor hian MZU-a Law department dah chu tha a tih thu sawiin, central ministry-ah a tul anga proposal siama bawhzui a lo tum tur thu a sawi a ni.
Minister chuan Mizoram University chu tunhnaia National Institutional Ranking Framework (NIRF) 2023-a university tha 76-na a ni thei te, North Eastern States-a university tha 2-na a ni thei leh Political Science department-in G20 denchhena seminar a buatsaih chu lawmawm a tih thu a sawi a. India ramin G-20 presidency a chelh chhunga khawvel mithmuha ram hmasawnna phochhuah a nih theihna’n leh hmasawnna tur, potential haichhuah leh zirchian kawngah he seminar hian Mizoram tan kawng thui tak a thlen theih thu a sawi a ni.
Mizoram chu ramdang nena inri a nih avangin insumdawn tawnna leh ramdangte nen inlaichinna kawngah pawimawhna a nei tih sawiin, heng lamah hian professor-te chu zirbingna nasa lehzual nei turin a ngen.
Nihnih awh tur national seminar hi academic session pali – G20 and India: Soft Powers & Local Actors; Sustainable Development Goals and G20; India’s Foreign Policy Issues and G20 tih thupuia then a ni a. Mizoram University, ICFAI University Aizawl, NEHU Shillong leh Vidyasagar University West Bengal atangin an tel a ni.