MZU-ah inpumkhatna seminar

Mizoram University Department of Mass Communication chuan ni hnih awh tur national seminar – ‘National Integration through Cultural Exchange’ chu Thawhtanni atang khan a buatsaih.
Seminar hawngtu MZU chief rector, larsap Dr Hari Babu Kambhampati chuan ram mipui inpumkhatna kawngah seminar buatsaih chu tha a tih bakah tunlai boruak thlir phei chuan a tul takzet tih a sawi a. Ram pakhata cheng ho, hnam ziarang leh khawsak phung inanglo tak takte indawh tawn a, tha taka awm tlan hi India ram angah phei chuan a pawimawh a. Inpumkhat tura theihtawp kan chhuah tlan chu khua leh tuiten kan mawhphurhna a ni tih hriat thar a ngai tih a sawi.
Tunhma deuh chuan India hmarchhakte chu en hran deuh a ni mai awm mange, tih tur ni mah se, Prime minister Narendra Modi mawhphurhna chan hnu ah he thil hi zawi zawiin siamthat zel a ni tih a sawi a. Tunah phei chuan mainland India leh India hmarchhakte kan intlawhpawh nasa sawt a, kawng engkim – ram hmasawnna, inkalpawhna leh inpumkhatna ang zawng pawhin hmarchhak hmasawnna hmuh theihin a awm tih a sawi a ni.
“Sawrkar laipuiin state hrang hranga chengte inhmelhriatna atana leh intlawhpawhna atana ‘Ek Bharat Shreshtha Bharat’ programme a kalpui chuan awmzia a nei a, inpumkhatna kawngah a tangkai hle. Inpumkhat a, inhrechiang tur leh inkawmngeih tur chuan a taka inchenchilh leh hmaichhan ngeia inkawm tluk a awm lo a. Hemi kawngah hian cultural exchange program hi a theih anga zing zawka kalpui a tha hle a ni,” Dr Hari Babu Kambhampati hian a ti.
Seminar thupui hi Dr Irene Lalruatkimi’n a sawihawng a, khualzahawm Prof Sunil Umrao, University of Allahabad chuan seminar-in a tum leh a thuken pawimawh zualte a sawi a ni.
Seminar neih chhung hian session 6 – offline session 2 leh online session 4 neih a ni dawn a. Session tinah hian seminar thupui hnuaiah zirbing tura mithiamten an thuziah an chhawpchhuah zir ho tur a ni.