MZU-ah NEP seminar nei

Mizoram University-ah "NEP-2020 Philosophy: Indian Philosophical Thoughts and Contribution of Thinkers to the field of Education" tih hmangin Nilaini atang khan ni thum awh ram pum huap seminar neih tan a ni.
	Seminar hawngtu larsap Hari Babu Kambhampati chuan National Education Policy 2020 chu education policy kan neih tawh zinga belhchian dawl ber, ram mipui mamawh leh mila duan a ni, tiin, NEP 2020 hian zirlaite chu khawtlanga an chhungkaw dinhmun emaw sum leh pai thu ah an chhungkaw dinhmuna thliarhrang loin, zirna tha zawk, intluktlanna leh remchanna angkhatin a chhawpchhuak dawn tih a sawi.
	He policy hian multidisciplinary education, research leh innovation lam a dah pawimawh bik dawn tih sawiin, "Hei vang hian India-in nakin lawkah khawvel thluak bur (Global Knowledge Super Power) nih a tumna pawh a hlen theih a beiseiawm," a ti.
	NEP 2020 chu document satliah a ni loa, he policy hian tihhlawntlin tur kawng hrang hrangah huntiam neiin a chhawp teuh tih a sawi. Hei vang hian NEP 2020 kalpui hi thil awlsam a ni lo tih a hriat thu sawiin, zirtirtute inpekna, taimakna, thahnemngaihna leh remhriatnaah a hlawhtlinna a innghat nasa hle tih a sawi a ni.
	National seminar hi Indian Council of Social Science Research (ICSSR) in Azadi Ka Amrit Mahotsav hmalakna kal zela a chhawpchhuah niin, Mizoram University Education Department-in a huaihawt a ni.