Nadal-a racket an hralh to

A career tawp hnaih lama hliamin nasa lehzuala a tlakbuak mek Rafael Nadal-a Grand Slam title lakpuina racket pakhat chu tunhnai khan lilamna atangin an hralhchhuak a, infiamna lam kaihnawiha bungraw hralhna man to berte zingah a lang pha nghal.
Kum 2007 French Open final-a Roger Federer a hneh tuma championship point a hmuhna tak mai racket kha online auction kaltlangin Thawhtanni khan US dollar 118,000 chuangin an hralh.
Paris final ropui bikah khan Nadal chuan Federer lakah 6-3, 4-6, 6-3, 6-4 hnehna changin, a ca-reer-a a Grand Slam title pathumna a hlawhchhuak a, khami atang khan hawikir loin Spaniard hian Roland Garros-ah hming a chher chho zui ta ngat ngat kha a ni a; hliam avanga a talbuai tak hnu hian kuminah pawh a ropumual Roland Garros hi a luah leh thei ang em sawi lawk theih a ni rih lo.
An racket hralh tak lamah bawk khan han kirleh lawk ila, kha racket kha tournament tir lamah pawh Nadal khan lek-chhuak tawhin, semi-final lama Novak Djokovic hnehna’n a hmang tawh bawk.
Australian Tennis Museum-ah an dahtha reng a, tunhnaiah an zuar chhuak ta a ni.
Tunhma lama mimal tennis racket lilamnaa an sum hmuh hraw zualte zingah pawh Nadal-a 2022 Australian Open racket (USD 139,700) lo tel tawh bawkin, Billie Jean King-i ‘Battle of the Sexes’ racket an tih mai (USD 125,000) leh Djokovic-a 2016 French Open racket (USD 107,482) a tel.