Naga Kristianten PM-ah Kristiante tawrhna thlen

Nagaland Baptist Church Council (NBCC) chuan Prime Minister Narendra Modi-a hnenah ram chhung hmun hrang hrangah, a bikin Krismas lawm lai veka an Kristianpui tam tak tihduhdah an nih chungchang chu ziakin an thlen a, inrawlh turin an ti.
NBCC hian Modi-a hnena an thlenah hian India-a Kristian tihduhdahna chu hmun tlem leh kilkhawra thleng chauh a ni lo va, a pung sawt em em niin an sawi.
“India-a Kristian tihduhdahna hi a pung nasa em em a, Kristian beihna hi a thleng tam sawtin a na sawt em em a, hei hi thil hlauhawm tak a ni,” tiin NBCC chuan an ziak.
United Christians Forum-in an chhinchhiahna an tar lanah January leh October, 2025 inkarah chauh khan vawi 600 chuang thlengin ni tin vawi hnih Kristiante tawrhna a thleng ziah ang a nih thu an thlen a. Heng zingah hian a huhova beihna, vantlang hmuha inkhawihna, inkhawm lai tihbuai leh Kristian chenna in tihchhiatsakte pawh a tel tih an tar lang.
“Khawvela mipui rorelna ram lian ber tia inchhuang taka kan awm laiin thil zahthlak leh duhawm lo tak a thleng a, khua leh tui tam takin Krismas an lawm lai tihbuai a ni a. Miin a rinna pho chhuaka zalen taka a pathian a biakna chu palzutsak niin a thleng a, a thleng nawn mawlh mawlh a ni,” tiin lehkhaah hian an ziak.
NBCC lehkhaah hian BJP pawh telin, Kristian MLA-te chuan aw an chhuah miah lo niin an sawi a. Bareilly (Uttar Pradesh), Lajpat Nagar (Delhi), Raipur shopping mall (Chhattisgarh), St. Mary’s School beihna, Nalbari (Assam) leh Kerala leh Rajasthan-ah a thleng na zual niin an tar lang.
“Kristian kan nihna leh India khua leh tui kan nihna angin sakhaw rin dan avanga intihduhdahna hi tawp nghal se kan duh a. Ram indin a nih theih nana Kristiante thawh ve kan ngaihtuahin ram himna, economy, culture leh politic-a kan thawh zawng zawng pawh hi tuna India-in a thlen chinah hian hma lan la ve nasa hle niin kan inhria a ni,” tiin NBCC hian an ziak.
“Kristiante chuan ram hmangaihna leh ram tana rinawmna hi kan hre thiam a, Kristiante hian Hindu nationalist-te aia ram tana an inpek loh bikna kan hre ve lo a ni,” an ti.
Tun hnaiah India-ah hian Kristiante tawrhna thleng sawi a tam hle a, a bikin Krismas lawma an pung khawm tibuai leh an cheina tihchhiatsakte pawh social media-ah a darh nasa hle.
Mi thiamte chuan kum 2014-a BJP kaihhruai sorkarin India-a rorelna an chan hnu atang khan Hindu ni lo sakhaw zuitu tlem zawkten tihduhdahna an tuar tam zual sawt niin an sawi bawk.