Naktuk-ah Miss India Mizoram Zuali Chhangte rawn haw dawn Miss India GujaratAizawl-ah rawn kal dawn

Femina Miss India 2023-a Mizoram atanga tel Miss India Mizoram C. Lalhmangaihzuali, aka Zuali Chhangte chu Miss India thlanna a zawh hnuah Imphal, Manipur-ah a la cham a, April ni 18-ah a rawn haw dawn a, Miss India thlan laia a roomate, a thian tha tak ni zui Miss India Gujarat, Simran Ajitsingh-i’n Mizoram tlawh turin a rawn zui haw dawn a ni.
C. Lalhmangaihzuali, aka Zuali Chhangte chu Miss India Mizoram-ah thlan a ni a, 2023 Miss India thlannaah Mizoram ai a awh ang. Zuali Changte hi Miss Mizoram Organisation-in an buaipui dawn a ni. Zuali Chhangte hi 2020 Miss Mizoram-ah telin, Top 6 a ni a, hemi tum hian Delhi-a hmunpui nei modeling agency Kay Savino Yhome-in contract an ziahpui pahnih zingah a tel nghe nghe a ni.
Miss India audition hi January ni 18 khan Guwahati-ah neih a ni a, hetah hian Zuali Chhangte bakah Uttar Pradesh atangin hnamdang nula pakhat chu Mizoram hminga audition ti awmchhun an ni a (Miss India guideline-ah hian hnamdang emaw, state dang emaw mi pawh ni se, an chhungte hnathawka an awmna state hmingin audition-ah an inlan thei ang tih a nih avangin UP nula pawh hi a chhungte Mizorama hnathawk an awm avanga Mizoram hminga audition-a inlan niin an sawi. Miss India audition-ah hian lehkha zira awmna state hming pawhin a inlan theih bawk a ni), Zuali hi Miss India Mizoram a ni ta zawk a, Femina Miss India 2023-ah pawh Mizoram aiawhin a tel ta a ni.
Zuali chuan Manipur nuam a tih thu sawiin, “An fel a, Manipuri zingah Mizo tawng thiam pawh an tam a, Mizo an tam ve bawk a, mahni ram ang deuh mai a ni a, mahse, lung a leng duh khawp mai,” a ti.
Zuali hian a Hindi thiam tawk loh chu hrehawm a tih thu sawiin, “Contestant zingah Megan-i nen khan Hindi hmang tha thei lo ber kan ni a, ani aiin ka la chak lo zawk lehnghal a, hei hi a hrehawm duh khawp mai. Nakin zelah pawh hetiang lama kal turte tan Hindi thiam hi a pawimawhna kan hriat thar a tha hle mai,” a ti bawk.
Zuali chuan Miss India-ah hian a tirah chuan tel a tum lo a, mahse, sawmna vawi thum vel a dawn hnuah chuan audition-a inlan turin thu a titlu thei ta chauh niin a sawi a, chutah Mumbai-a intuai hriam turin thla khat vel an awm zui ta a, “Mumbai-a kan chhuk kha, thil inthlak danglam thut kha ka awm thiam lo a, lung te kha a leng duh khawp mai a,” a ti bawk.
Zuali hi Times Talent hnuaiah contract a ziak nghal a, a graduate velah Mumbai-ah chhuk nghalin, Times Talent hian an lo buaipui zui dawn a ni. Times Talent hi modeling mai bakah acting lamah pawh ram pum huapa agency lian leh hriat hlawh an ni a, India-a talent scout lian ber pawl an ni.
Zuali chuan Miss India a tel theih nana buaipuitu leh support-tu zawng zawng te chungah lawmthu a sawi a, “Miss Mizoram Organisation leh Zonet chhungkua ten a bul atanga a tawp thlengin min buaipuia, engkima min support-tu leh min tawngtai pui rengtu ka chhungte an awm bawk a. A mimal takin Michelle Varte chungah ka lawm tak zet bawk. Ka kal dawn khan inbuatsaihna hun kar hnih vel chauh ka neia, ka thawmhnaw ken tur zawng zawng kha designer te tan thui hman a ni tawh lo a, Michelle hian a kawr tam tak min hnawh tir a ni. Benjamin Ralte Designing Studio pawhin kawr min buaioui a, Tluangpuii Hmar-in formal dress thenkhat min buaipui bawk a, Oriflame lamain cosmetic lama min pui a, Lampar hoin puan bik tur min tah sak bawk a, designer Manuntei’n kawr (top) min buaipui bawk a, Kristies Avon leh Shop at Judy’s ten ka mamawh tam tak min buaipui bawk. An chungah hian ka lawm tak zet a ni,” a ti.