Nakum inthlan thlirin Congress-in Assam chief atan Gogoi ruat

Nakum inthlan thlirin Congress-in Assam chief atan Gogoi ruat
Nakuma Assam assembly inthlan lo awm tur thlirin Congress chuan Lok Sabha MP Gaurav Gogoi-a chu state president thar atan a ruat a, Bhupen Kumar Borah a thlak ang.
Congress hian working president thar pathum – Jakir Hussain Sikdar, Roselina Tirkey leh Pradip Sarkar te an ruat bawk.
Congress MLA leh minister hlui, Ripun Bora chu Election Management Committee chairman atan an ruat bawk.
Assam assembly kal mek hi May 20, 2026-a tawp tur niin Congress hian state inthlan lo awm turah BJP paih thlak ngei an tum.
“Congress president chuan Gaurav Gogoi-a chu Assam Pradesh Congress Committee president atan leh working president tur pathum a ruat,” tiin AICC General Secretary K C Venugopal chuan thu a chhuah.
Assam chief minister hlui, Tarun Gogoi-a fapa, Gogoi-a hi Lok Sabha-a Congress party deputy leader a ni a. An state president atana ruat a nih mek lai hian Chief Minister Himanta Biswa Sarma leh BJP chuan a British nupui avanga beiin Pakistan-a spy agency ISI nena inzawmah an puh a ni.
Nihna thar an pek hnuah Jorhat MP hian Congress President Mallikarjun Kharge, Lok Sabha-a Leader of the Opposition Rahul Gandhi, Venugopal leh General Secretary in-charge Assam, Jitendra Singh te chungah chanvo pawimawh tak an chelhtir avangin lawm thu a sawi.
Venugopal-a’n thuchhuah a siamah chuan PCC president kal chhuak tur, Borah-a thawhrimna leh party tana a inpeknaah lawm thu a hrilh bawk.
Gogoi-a hnena chanvo thar pek a nih hnuah an party chuan assembly inthlan lo awm tur chu a kaihhruaina hnuaiah an hmachhawn dawn a nih ngei hmel ta a, chief minister atana an zawrh tur pawh a nih ngei a rinawm.
“Congress president chuan Assam Pradesh Congress Committee-a Campaign Committee, Coordination Committee, Manifesto Committee, Publicity Committee leh Election Management Committee chairperson thar turte a ruat bawk,” tiin Venugopal-a chuan a tar lang.
President kal chhuak tur, Borah-a hi Campaign Committee chairman atan ruat a ni a. Debabrata Saikia chuan Coordination Committee hovin Lok Sabha MP Pradyut Bordoloi-a’n Manifesto Committee a kaihruai ang a, Rakibul Hussain, Lok Sabha MP chu Publicity Committee chairperson a ni bawk ang.