OPERATION SINDOOR: Pakistan-in Rajasthan-a drone 413 a thlawhtir kap thla vek

OPERATION SINDOOR: Pakistan-in Rajasthan-a drone 413 a thlawhtir kap thla vek
Pakistan-in drone 413 hmangin Barmer, Jaisalmer, Bikaner leh Sri Ganganagar district-te kapin heng zawng zawngin van sanga a awm laiin India-a air defence system-in an kap thla vek niin Border Security Force (BSF) Inspector General (Rajasthan Frontier) ML Garg chuan a sawi.
Jodhpur-a BSF headquarters-a thuthar lakhawmtute a kawmnaah Garg-a chuan khawthlang lam ramria Operation Sindoor kalpui laia sipaite hlawhtlinna chu Thawhtanni khan a puang.
Pakistan-a sipaite hian Phalodi air base telin Rajasthan-a hmun pawimawh tak tak an bitum tih a sawi a; mahse, Indian sipaiten a hun takah tha takin, mamawh ang takin an chhang let tih a sawi.
Garg-a chuan Pakistan atanga missile leh drone kah chhuahte hi a ruak ringawt a ni lo va; mahse, engmahin Indian leilung a tawk lo va, thil tihchhiat a nei lo va, sipai leh civil mite khawih pawh a nei lo tih a sawi.
“Lei a thlen hmain kan anti-missile technology leh air defence system-in van sangah a kap chhe hman vek a ni,” a ti a. Leiah hi chuan drone keh darh them leh missile mu ruak chauh a tla tih a sawi.
Heng thil tlate hian chenna in thenkhat a delh chhe ve am pawi lian erawh a khawi lo va, khawthlang lam ramri-ah civil mi thi leh hliam engmah an awm lo tih Garg-a chuan a sawi.
“Tun lai thiamna changkang nen inbuatsaihna tha tak a awm avangin nasa taka inhloh theihna pumpelh a ni,” a ti.
Pakistan nena inepna boruak a awm chhung khan BSF officer lawk tak takte chu ramri-ah tirin venhimna kalpui dan an ruahman a, ramri hnaiha chengte himna tur ngaihtuahin an awm chilh tih a sawi bawk.
Operation Sindoor kalpui laia inbuatsaihna chungchang sawiin Garg-a chuan Pakistan lamah sipaite chu ramri hrulah an intlar nasa a; mahse, Indian sipai tumah an hnungtawlh lo tih a sawi.
Tar lan tawh thin angin Operation Sindoor kha April 22-a Indian awp Kashmir-a Pahalgam hmuna mi firfiakten mi 26 an thah hnuah India-in sipai chakna hmanga Pakistan leh a awp chin Kashmir-a helho tawmna hmun kua a kapa beihpui a thlak kha a ni a. Hemi hnuah hian ni li chhung vel Pakistan leh India hi ramri-ah nasa takin an inkap zui a ni.