National Ayurveda Day hmang
Directorate of AYUSH, Health & Family Welfare Department buatsaihin Thawhlehni khan Aizawlah ‘Ayurveda Innovations for Global Health’ tih thupui hmangin ‘9th National Ayurveda Day 2024’ hman a ni a. Mizoram larsap Dr Hari Babu Kambhampati leh Health & Family Welfare minister Lalrinpuii ten an hmanpui.
Hmanlai atanga inenkawlnana lo hman tawh ayurveda chu hriselna kawnga inenkawlna mai ni lo, nunphunga bet tel a ni tih larsap hian a sawi a. Ayurveda chu tunlai natna tlanglawn – lung natna, cancer, stroke leh zunthlum venna kawngah a pawimawh tih khawvelin a hmelhriat chho mek niin a sawi.
Mizoram leh hmarchhak chu biodiversity hrang hrang tamna, hemi kawnga hausa leh theihna nasa tak nei a nih avangin hengte leh Ayurveda kan thlunzawm phawt chuan kan healthcare system kan tihchangtlung thei dawn tih a sawi a ni.
Tunlai thiamna leh tihdan phung tlo leh tha zawkte nen ayurveda kalkawp tir thiam chuan India mai ni lo, khawvel pum tan hlawkna a pe thei dawn tih Dr. Hari Babu Kambhampati hian sawiin, “Ram 24-in ayurveda hi an pawmpui tawh a, tunlai zirna inte pawhin ayurveda hlutna an pawh mek zel a ni,” a ti. Ministry of AYUSH hmalakna in ayurveda atanga thil siam hi ram 100 chuangah thawn chhuah a ni tawh tih a sawi bawk.
Health minister pawhin Mizorama ramhmul damdawi tam tak kan neih leh hemi lama tualto thiamna kan neih chu ayurveda chawilar kawngah a tangkai thei a, healthcare system pangngai nena kalkawp tir thiam a tul tih a sawi. State Medicinal Plants Board chairman ni bawk Lalrinpuii hian ramhmul damdawi chin leh sawngbawl kawnga hmalakna a sawi a ni.
National Ayurveda Day 2024 pual article inziahsiak lawmman sem nghal a ni a. 1-na Lalsangzeli, Khawlailung (Rs. 10000 + certificate), 2-na Dr Jonathan Lalrinmawia, ITI Veng (Rs. 7000 + certificate), 3-na Lalnuntluanga, College Veng (Rs.5000 + certificate)
National Ayurveda Day hmang
Get real time updates directly on you device, subscribe now.
Prev Post