National AYUSH Mission-ah medicinal plants telh leh ngen

On May 19, 2023 19 0

National AYUSH Mission hnuaiah medicinal plants telh leh turin Mizoram Health minister Dr R Lalthangliana chuan AYUSH hotute a ngen.
Ni hnih awh tur National AYUSH Mission Conclave chu Ningani atang khan New Delhi-ah neih tan a ni a. Dr R. Lalthangliana hian thu sawiin, Mizoram State Medicinal Plants Board-in National AYUSH Mission hnuaiah society 9 (chhungkaw 270) in hlawhtling takin hma an la tih a sawi. Chutihrualin kum 2020- 2021 atanga National AYUSH Mission hnuaia medicinal plants telh a ni ta lo chu pawi a tih thu sawiin, telh leh turin sawrkar laipuia thuneitute a ngen. Mizorama ramhmul damdawi zirchian a, tihchangtlun a nih theihna’n North Lunglengah Herbal Garden din tum a nih thu a sawi bawk.
Mizoramah AYUSH doctor mamawh belhna a nasa tih a sawi a, rawtna a neihte a thlen nghal. Mipuiin AYUSH damdawi an hman tangkaia an hriatchian theihna tura rawtna a thlen a. Khum 50 awmna AYUSH Hospital leh khum 10 awmna AYUSH Hospital dinna atana Union AYUSH minister-in lungphum a phum tawhte a rang lama sum sanction sak turin a ngen.
Mipuiin daihzai zawka AYUSH damdawi an hmuh theihna’n AYUSH ministry-in a lo sawihmuh tawhna hmun hrang hrang – Khawhri leh Muallianpui (Hnahthial district), Zawlpui (Lunglei district), Silsuri (Mamit district), Sangau (Lawngtlai district), Lopu (Siaha district), Zokhawthar (Champhai district), Lungdai (Kolasib district) ah te dah a nih theihna’n ruahmanna siam a ni tih a sawi.
Concalve-a a tel hnu in minister Dr R Lalthangliana hian Ministry of Micro, Small & Medium Enterprises (MSME) secretary BB Swain hmuin Mizorama mau hman tangkaina atana scheme hrang hrang MSME scheme hnuaia rinluh dan tur a sawipui. Ministry of Education adviser Manmohan Kaur leh official-te RUSA 3.0 an peih har lutuk leh thil la fel lo te, RUSA 2.0 sum la release kim loh te a rang lama pechhuak a, tifel turin a ngen bawk.
Nilaini khan NITI Aayog member (Health) Dr VK Paul chuan Dr R Lalthangliana hi zanriah a buatsaih sak a, minister chuan ZMC recognition leh harsatna hrang hrang an neih thinah MCI chairman a lo nih tawhna anga thurawn tha tak tak a pek thin avangin lawmthu a hrilh a ni.