Serchhip dai tualthihnaah midang inhnamhnawihna awm la hre lo

May 16 zingkara Serchhip Bukpui daia tualthihna chungchangah pawikhawihtu nia hriat man a nih hnu ah, midang inhnamhnawih an awm hriat a la ni loa, police-in an la chhui zui zel.
Serchhip SP Vanlalnghenga sawi danin, he tualthihna hi May 16 zing dar 2-5 inkar vel nia rin a ni a. Ruang hmuh hi zing dar 5.45 a ni. He ruang hi Lalsangzuala (31) s/o Lalhmahruaia, Mission Vengthlang Aizawl a ni tih finfiah zui deuh mai a ni a. Pawikhawihtu chhui hna hi Serchhip Police chuan Special Investigation Team (SIT) dinin an thawk zui nghal a ni.
Nunna chan Lalsangzuala lirthei, Bolero MZ-01U 9639 chu Chhiahtlang khawchhung YMA Run bulah kawngsir thing chhehkhawmah tlanlawnin hmuh a ni a, thil awmzia enin tualthattu hian ruang hi kawng thlangah a paih a, a mi thah lirthei hmang hian tlanchhiat a tum niin a lang tih a sawi.
Serchhip SDPO Kaste Romalsawma kaihhruai SIT hian police station hrang hrang be pawpin, he thil thleng kaihhnawiha pawimawha rin mi chi hrang hrang an bia a, thil thlen lai vela kawngpui paltlangtu lirtheite ngun takin an chhui a, pawikhawihtu tlanchhiat zui zel theihna tur nia ngaihte pawh chipchiar taka an dap kual hnu ah, he pawi khawihtu ni ngeia rinhlelh hi an hre ta tih Serchhip SP hian a sawi.
Pawikhawihtu hian mi a thah pawisa hi laksakin, a mi thah lirthei vek hian Aizawl lam panin a tlanchhia a, mahse a chetsual zui avangin lirthei hi Chhiahtlangah kawngsirah hnutchhiahin, ke in a tlan chhe zui ta a. Chhiahtlang – Lamchhip road zawhin Mat lui a thlenthlak hma deuhin maxi cab service a lo phar a, Aizawl a lut nia rin a ni a, SIT hian umzui nghalin, Aizawla police-te nen tanghoin pawikhawihtu ni ngeia hriat Lawrence Laldinthara (42) hi May 17 chawhnu khan an man ta tih a sawi a ni.
Hnu chhuina atan pawikhawihna thlenna hmun vawnhim a pawimawh hle tih SP hian a sawi a. Pawikhawihna hmun (crime scene) kan vawnhim poh leh hnuchhui a samin hma lak a awlsam thin tih mipuiin hriatsakin, pui tha deuh deuh se an duh tih a sawi. “Tun tuma thil thlenna hmun pawh rang taka venhim leh hung a ni a, hnuhma enfiah turin Aizawl atangin forensic expert-te rang takin an lokal a ni,” a ti. He tualthihnaa mawhphurtu hian a phu tawk hremna a hmuh theihna’n theihtawp an chhuah dawn a, an hnathawh tibahlah thei thu belhchian dawl lo leh midang tichiai thei thehdarh lo turin mitin a sawm tih a sawi a ni.
Police hotute sawi danin, tun thlengin pawikhawihtua puh Laldinthara hian thurualpui a neih awm hriat a la ni lo.
Thudawn dang sawi danin, pawikhawihtua puh Laldinthara hi Serchhipa awm nghet lem lo, khawsakna nghet pawh nei lo leh vak rawlai thin niin, pawikhawihna a thlen zan hian Lalsangzuala nen hian intawngin an inkawm a; Chhingchhip lama thlah tura a tih chu an inkawm rei hnuah Lalsangzuala hian a peih leh tak loh avangin kut a thlak ta nia sawi a ni. Lirthei khalh ngai lo chungin Lalsangzuala Bolero hi khalh zuiin, thui pawh a kalpui thei loa, ke in a tlanchhe zui ta tih sawi a ni. Laldinthara hi kar kalta khan Serchhipah mobile phone a ruk avangin man a ni a, phone neituten thubuai an siam loh avangin chhuah leh a ni.