National Pool Championship khela kalte lo kir
National Pool Championship khela kalte lo kir
Inrinni khan Mizoram Snooker & Billiards Association (MSBA) chuan Indian National Pool Championship ( 9 & 10 Ball) 2023-a Mizoram aiawhtu player pathumte Lengpui airport-ah an hmuak.
Player hmuahte hi PB Liansangzuala (Dawrpui), Lalrina Renthlei (Tuikhuah-tlang) leh Laltlansanga (Lunglei)-te an an ni a; Lalrina Rentlei hian 9 ball-ah bronze medal a lo hawn nghe nghe.
MSBA hian an president Vanlal-nghaka hoin Lengpui airport-ah an lo hmuak a; Lalrina Renthlei hian 10 ball lamah pawh quarter-final a thleng. Laltlansanga’n 10 ball-ah round of 16 a thleng pha ve bawk.
September 9, 2023 Inrinni khan 9 ball semi-final match khelin Lalrina hi Delhi lam mi Sundeep Gulati chuan 10-4-in a hneh a; an match hi race to 10-a khelh a ni. Chumi awmzia chu vawi 10 chak hmasa sa tihna a ni.
September ni 14 khan 10 ball quarter-final khelin Lalrina Renthlei hi a vanduai zawkah a tang bawk.
He huangah hian 9 ball semi-final lama a hneh loh, champion zui ta Sundeep Gulati chu 10 ball pre quarter-ah hneh mah se quarter-final-ah a chak zo ta lo a ni.
September ni 1, 2023 atanga khelh tan Indian Pool National Championship (9 & 10 Ball)-ah hian Mizoram state aiawhin MSBA player pathum tarlan takte hi chhuakin, he championship hi Daly College, Indore, Madhya Pradesh-a nghah niin, September ni 15 khan a hmawr bawk a ni.
Lalrina Renthlei hi Snooker-ah kum 2010-11 season khan national junior champion a lo ni tawh a, snooker-ah India aiawhin senior-ah vawihnih leh under 21-ah vawihnih bawk a lo khel tawh a; pool-ah hian tum hnih senior-ah bronze awrh tawhin, India aiawhin vawihnih a khel tawh bawk.
Basketball lamah pawh Lalrina hi player pawimawh tak a ni a; basketball-ah hian India senior team-ah player pawimawh tak niin a lo tel tawh a, South Asia Basketball Championship (Sr)-ah kum 2021 khan India tan a lo champion tawh a ni.
Hemi bakah hian FIBA 3×3 world tour tum hnih khel tawhin, FIBA 3X3 No 1 a lo ni tawh bawk.
Mizoram Basketball Association (MBBA) buatsaih Mizoram Super League-ah vawinga a zawna champion niin, Vikings-ah MSL 1-3 a khel a, MSL 4 atangin tun thlengin Zarkawt BCA-ah a khel a ni.
Hawla Indoor Stadium, Republic Vengthlang-ah hian Mizoram Snooker & Billiards Association leh Mizoram Basketball Association (MBBA)-in hall an neih ve ve avangin ‘Hawla Indoor Stadium-ah hian Lalrina tana Mizoram denchhuahna tham game a kim’ an tifiam thin.