National Sports Day hmang

India ram hockey khel thiam lar Major Dhyan Chand piancham denchhenin August 29 khan India ram pumah National Sports Day hman a ni a. Mizorama a lawmna pui ber chu Sports Authority of India (SAI) State Training Centre, Mission Vengthlangah hman a ni. Kumin thupui atan “Sports for the promotion of Peaceful and inclusive societies” tih a ni.
Sports Day hmanpuitu Sports & Youth Services secretary Lalramsanga Sailo chuan sports chu mihringte indaidanna thiattu, remna leh inpumkhatna atan hmanrua pawimawh a ni, tiin, hriselna leh infiamna chu thil kalkawp tlat, mimal invawn nan, ruihhlo do nan leh rilru lam harsatna hneh nan a tangkai tih a sawi a. Vision Olympic 2036 kalpui mekah sports lama thawktute tangrual turin a sawm.
Day hmannaa telte hi SAI regional director Lianminthang kaihhruaiin taksa a hrisel zawk nan nitin darkar chanve tal taksa sawizawi thin turin an intiam a ni.
Infiamna chi hrang hrang – mini marathon leh indigenous games telin hun hman chhunzawm nghal a ni a. Sports & Youth Services office hrang hranga – Secretariat, Directorate leh MSSC, KISCE, NCC, NSS , SAI leh athletes-ten hun an hmang ho.
A kharna inkhawm chu Sports & Youth Services director H Lalhmingthanga’n a hmanpuiin, lawmman a sem nghal a ni.
National Sports Day hi School Education department hnuaia school leh college hrang hrangah NCC, NSS, district hrang hranga Sports & Youth Services office-ah leh district hrang hranga Khelo India Centre-ah te hman a ni bawk.