National Sports Day hmang

National Sports Day hmang
India rama hockey khel thiam lar Major Dhyan Chand piancham denchhenin Zirtawpni khan India ram pumah National Sports Day hman a ni a, Mizoramah pawh district tinah hman niin, a lawmna pui ber chu Sports Authority of India (SAI) State Training Centre Mission Vengthlangah neih a ni.
SAI Centre-a hman hmanpuitu MLA T Lalhlimpuia chuan sports chu mihring hriselna atana pawimawh, taksa vawngthatu leh rilru hrisel min siamsaktu a ni, tiin, mihring inpumkhatna siamthatu a ni tih a sawi. Infiammite chu an thlen chin atanga hmasawn tum zel tur leh tumruha leh teirei peih turin a chah a ni.
Kumin National Sports Day thupui chu “Sport to Promote Peaceful and Inclusive Societies” tih a ni a. Sports Authority of India (SAI) regional director Lianminthang kaihruaiin thuthiam an sawi. Taksa leh rilru hrisel nei tura hma an lak tur thu leh an chhungte leh an thiante pawh infiamna lama tui tura fuih tura intiamna a ni.
Infiamna chi hrang hrang – futsal (mipa), volleyball (hmeichhia), arpa insual (mipa), inkawibah (hmeichhia), hockey leh dart throw hmangin inel a ni a. Sports & Youth Services office hrang hranga thawkte – Secretariat, Directorate leh MSSC, KISCE, NCC, NSS , SAI leh athletes-te chu group pali – Jeremy Lalrinnunga Group (Blue), Lallianzuala Chhangte Group (White), Lalrina Renthlei Group (Black) leh Lalremsiami Group (Red) an inthenin an inel a ni.