NATO summit-in ngaihven hlawh nasa

North Atlantic Treaty organisation (NATO) chuan annual summit July 11 leh 12 hian Vilinius ah an nei dawn a. Russian president Vladimir Putin chuan a uksak hle ngei dawn a ni.
Joe Biden, Emmanuel Macron, Rishi Sunak, Olaf Sholz leh world leader hrang hrangte bakah NATO member ram 31-a ambassador rual te chuan inhmuhkhawmna neiin Ukraine chungchang chu an thu khel ber tur a ni ang.
Tunkar hi Russia-in Ukraine a run atanga ni 500-na a ni dawn a, Ukraine ram chhuh tuma, civilian te beia naupangte hruai boa nasa taka chet lakna a neih chuan khawvel a tibuai hle.
Vladimir Putin timangang turin Europe leh US te chuan Ukraine chu nasa takin an pui a, Kiel Institute for the Global Economy te chuan Ukraine puih nan hian $165 billion thehchhuah a ni tawh an ti.
Khawthlang ram te chuan Moscow hnenah Kremlin chuan Ukraine emaw Europe ram khawi mah a duh anga a chhuh mai mai an remti dawn lo tih an hriattirna leh chutih rual chiah chuan nuclear power Russia nena direct-a inbakkaihna thleng bawk si lova chetlak ngai bawk si chu a khirhkhan tia sawi a ni a.
US President Joe Biden chuan, “Tun dinhmun, indona thlen mek lai hi chuan Nato bikah Ukraine chu nato family-a lakluh ni se tia inlungrual thapna a awm lem lo,” tiin a sawi a.
Ukraine-in Nato zawm se chuan ‘indona a thleng mek si a, indona kan hmachhawn mek lai leh Russia nena inhmachhawn mek lai a ni bawk si a ni’ tiin a sawi.
Nato chuan Russia-in Ukraine a run ni 500-na ni tawhah pawh inbuktawk taka awm a la tum a, mahse, harsa a ti tial tial thung. Chutih laiin Ukraine-in a duh dan a tichiang hle thung a, Nato table a thut ve a duh a, Nato a luha security guarantees hrang hrang te chan a hmanhmawh thung.
Chu chu tihhlawhtlin nise a duh a, mahse, Nato chuan indona awm mek laiin member-ah a la lut thei lo tih a hre bawk si a, mahse, Ukraine chu Nato-ah a lut ngei ang tih tihchianna a phut thung a ni.
“Kan tan kawng a inhawng lo tihna a ni lo va, mahse, a inhawng zim a ni a, Ukraine luh theih nan a la zim a ni tiin Ukraine president Volodymyr Zelensky chuan a sawi a.
Nato summit neiha inlan lohah te a vau hial a, chutiang a ti a nih chuan Nato member-te chu a tilungawi lo dawn thung a. Zelensky a inlan lo a nih chuan Ukraine chungchanga Western unity chu a pherh thei thung bawk.
Buaina ber chu Nato chuan kum 2008 daih tawh khan Russia-in a run hma daihin Ukraine chu Nato ah inlut dawn nia an ti tawh a. Chu tak chu Kyiv chuan Nato atangin thil chiang fek fawk a beisei tawh a ni. Nato member te pawhin Ukraine chu an pawm tawh a, mahse a kimchanga kalpui dan turah ngaihdan a inang lo thung.
Nato summit hi Lithuania capital Vilinius ah neih tur a ni a, baltic ram Russia thenawm mai niin Soviet Union a tel thin an ni bawk. Lithuanians, Latvians leh Estonians te chuan Ukraine tawrhna chu an hriatthiampui ber tia sawi a ni a, anni bakah Poland a tel bawk a. Russian inluling tuartute niin hei vang hian Ukraine hnena Nato member nihna pek vat thlawptute an ni.
Mahse Nato thutlukna siam turah Germany, US leh UK te chu an fimkhur thung a. Nato a luh dawnin ramin tihtur tihmakmawh chinfel hmasak tur a nei thung a. Reforms a kalpuj a ngai a, eirukna a do a ngai a, armed forces a thunun that a ngai bawk a, chuti maia Nato member nih chu duh teh mah se luh leh neih awlsam a ni hauh lo.
Nato member nihna chungchangah Camille Grand, ex-Nato leh tuna defence expert, European Council on Foreign Relations chuan Ukraine hian a dawh theih a ngai a ti a. Khawthlang ramte hian hun rei tak an hisap a ni, a ti.
Russia hian Ukraine a run nan hian hun rei tak ruahmanna siamin hma a la a, chu chu awlsam takin Ukraine-in hun rei lote chhunga a chinfel mai theih a ni lo an ti a. Vilnius summit-a sawihona tur pawimawh ber chu Europe defence industry a ni dawn a ni, an ti bawk a. Ukraine-in ralthuam mamawh a neih reng theih nana pawimawh a ni tlat tih a ni bawk.
Pahnihnaah chuan Ukraine chu Nato ram la ni lo mah se, UK, US, France leh Germany te chuan Kyiv security guarantees an pe thei a, chumi tur chuan hma an la thei tih a ni bawk.
Vilnius summit-ah hian Nato-Ukraine Council din a ni dawn a, hei vang hian Ukraine President Zelensky chuan he summit hi a tel ngei ngai a ni bawk a. He council hi Kyiv puihna tihchakna tur liau liau tih a ni bawk.
Nato chuan Ukraine bik hi duhsakna pe dawnin Membership Action Plan chu a zawm ve ngai lo tura siam a tum tia sawi a ni bawk.