Nau paitu in a hrin a ngai – Lalruatkima

Nau paitu in a hrin a ngai – Lalruatkima
Lunglei Municipal Council chu MNF sawrkar ruahman leh din a nih angin, sawrkarna chelh tur pawhin MNF ngei an nih a ngai tih minister Lalruatkima chuan a sawi a. Nau chu a paitu ngeiin a hring anga, a hringtu ngeiin a enkawl zui a ngai tih a sawi.
Lunglei Municipal Council inthlan tura Thawhlehnia Zohnuaia street campaign neihah MNF adviser Lalruatkima hian, Lunglei mipuite MNF candidate vote turin a ngen tih a sawi.
MNF sawrkar chuan kawng hrang hrangin hmasawnna a thlen nasa a. Health care, kawngpui siamthat leh kawng hrang hrangah kum 5 kalta kha thlirlet turin a chah. “Hrilengin kum hnih min tibuai chungin hma kan sawn nasa hle. Gas a hnianghnar ta hle a, buhfai tha thlan ngai loin a tha ta vek mai. He sawrkar hian nitin ei bar mamawh hnianghnar takin min pe zel a ni,” a ti.
Ramri humhalh chungchangah MNF chu a tlanchhe ngai loa, huaisen takin ke a pen ngam tih a sawi. Hrileng avangin ram a phek buai a, vawk pul hri leh lirnghing nen kum hnih chhung kum chhia kan tawk tih Lalruatkima hian a sawi. “Pathian hruainain chhuanchham kan awm loa. Hun chhia min petu Pathian hian he sawrkar hi kum that kum min pe ang tih ka ring tlat a ni,” a ti.
Congress party chu an phur lo em em a, that loh theih lohna bawm an zuar a. An bawm zawrhah hian an mahni intifai hmasa phawt se, mipuiin an ti a. Tun LMC-ah pawh beisei tur an awm tawh lo, tiin MNF hruaitu hian a sawi. ZPM chu social media-ah an sawrkar a. An ni hi hmana kan hriat thinte tho kha an ni a, an kawr hak an thlak mai, tiin a sawi bawk.
“Election apiangin symbol an thlak a, a mumal loh thlak hle. Pawl thar siamte, pawl hming thlakte an uar em em a. LMC inthlanah pawh an symbol an thlak leh tak hi,” a ti.