India Republic Day 2023 puala huaisen chawimawina dawngtu Mizo naupangte chu Thawhlehni khan Social Welfare minister Er Lalrinawma’n anmahni lawmna inkhawm a buatsaih.
-- Advertisement --
Mizoram State Council for Child Welfare (MSCCW) president ni bawk Er. Lalrinawma chuan Mizo naupang leh Zofa chhulchhuak zingah President Award dawng thei an awm chu lawmawm a tih thu a sawi a. Ram leh hnam tan mi chhuanawm leh entawntlak ni zel turin a chah. Naupang rilru thianghlim takin mahni mihringpui chhanhimna atan nunna thapa an thawk chu ropui a tih thu sawiin, an thiltih chuan midangte chona a pe nasa hle tih a sawi a ni.
Republic Day puala Mizo naupang President Award dawng te chu – Jolyn Malsawmsanga s/o Lalmuankima, Pukpui Lunglei; Lalramliana s/o Lalrinchhana, New Hruaikawn,Champhai district; Vanlalfela s/o Lalrinthanga, Thenzawl Venghlun; Christian Vannunzira s/o Rosangzuala, Chhingchhip an ni.
Covid-19 leng vangin kum hnih chhung he award hi a taka sem theih a ni lo a, kum 2021 leh 2022 chhunga huaisen chawimawina dawngte chu kuminah pek rual an ni. Mizoram atang hian 2021 ah mi pathumin an dawng a, 2022 ah pakhatin a dawng leh a, state 17 atangin naupang 56 in an dawng.