Social Welfare & Tribal Affairs department bultumin Zirtawpni leh Inrinni awhin Aizawl Sipai Lammualah Pawl Kut hman a ni a. A hawnnaah Social Welfare & TA minister Er. Lalrinawma chu Kut Pa niin SW&TA secretary KT Beicho chu Kut thlengtu a ni.
-- Advertisement --
Kut Pa chuan Mizo hnam ziarang leh nunphung duhawm tak chawinung zel tur leh, kan hnam lam leh hlate humhalha ti thangmawi zel tura theihtawp chhuahtute lawmthu a hrilh a. SW&TA department-in Art & Culture, Tourism leh School Education department te nen thawkhoa Pawl Kut an buatsaih chu lawmawm leh chhinchhiahtlak a tih thu a sawi.
“Khawvel thang zel leh hmasawnna chak taka kal mek hian kan hnam nun leh ziarang mawi tak kha a pawlh dal tial tial em, tiin a ngaih theih a; kan hnam ziarang leh nunphung kan kalpui thin kha a thi mek zel a, thangthar zingah phei chuan hriat alawi nei mang lo an tam tawhin a rin theih. Hetiang dinhmun kan thlen tawh avang hian a sawia sawi ringawt loa, a tak taka mit ngeia an hmuh a, an vawn chhunzawm theihnan Pawl Kut hi buatsaih a ni,” Er. Lalrinawma hian a ti a. Thangtharten hlawk taka hmang turin duhsakna a hlan a ni.
Pawl Kut hi nihnih awh tur niin, Zirtawpni khan middle school leh high school zirlaite pualin Mizo infiamna leh chheihlama intihsiak buatsaih a ni a. Middle school zirlai mipate tan Sakuhuilut, inarpathai leh tawlailir intlansiak hmanga intihsiak a ni a, hmeichhe tan Zawnga leilawn dim dim, Ketaminu tlan leh invawr hmanga intihsiak a ni.
High school zirlai mipate tan insuknawr, inarpasual leh kalchhet hmanga intihsiakna neiin, hmeichhiate tan ketaminu tlan, kawikah leh tuium khirh tui chawi hmanga intihsiak a ni.
Art & Culture director Carol VLMS Dawngkimi chuan Pawl Kut chungchang ziah dan hrang hrang sawiin, he Kut chanchin hi a sawi a ni.