Naupang sawisatu jail-ah dah

Naupang sawisatu jail-ah dah
Champhaia veng pakhata a naupang awm sawisatua puh hmeichhe pakhat chu court-a hruai a nih hnu ah jail-a dah a ni.
Thudawn danin, Champhai Venglai ami Lalruatpari (24) chuan naupang kum 4 mi chu a nu inhlawha a chhuah a ngaih thin avangin chhunah a lo awm sak thin a. Naupang nu hian chhuna an thil ei na tur chu fapa hi a kentir thin a ni. Tunkar Thawhtanni khan naupang hian amah awmtu hi a pan leh a, nau awmtu hian chhun thil ei na tur a rawn ken leh ken loh a zawt a, naupang hian a nu in a kentir lo niin a sawi. Hei hi thinrim puiin Lalruatpari hian kut a thlak zui ta niin a insawi.
He naupang hi nikhaw hre lo khawpa a awm avangin damdawi inah hruai a ni a, a ban veilam ruh tliakin, a lu ruh a khik bakah a lu-ah thi a tling niin damdawi in thawktute chuan an sawi. Tunah hian a tul anga enkawl zui mek nia sawi a ni.
He thil hian Champhai District Child Protection Officer beng a thleng a, an ni hian police station-ah FIR thehlutin, naupang sawisatu nia puh hi man a ni a, District Court-a hruai a nih hnu ah court hian District Jail-ah dah rih turin a chungthu a lo rel a ni.
Hetihlai hian, kut tuartu naupang kum tling lo thlalak hi social media-a vawrh darh a nih avangin District Child Protection Unit chuan dan phal loha thlalak vawrhdarhtu hi an chhuizui mek tih sawi a ni bawk.