Nautihtlak chungchang SC-in rel mek

Hmeichhia naupaiin a naupai kar 26-na hmang mek tihtlak a tumna lamah Supreme Court chuan zawhna pawimawh tak siamin nau insiam tantir (foestus) leh nuin a taksa thu a neihna inbuktawka siam dan turah zawhna a nei a.
Chief Justice of India DY Chandrachud chuan court-in nau la piang lo rights chu an ngaih pawimawh a ngai, tiin a sawi a. “Nuin a taksa chunga a thuneihna chu a chungnung ngei a, mahse tumah nausen tana ding an awm lo. Engtiangin nge inbuk tawk taka kan kalpui theih ang?” tiin Chief Justice chuan a hmaa nautihtlak remtihna a pek tawh a hnuhkir leha solit verdict a awm hnuah zawhna a zawt a ni.
“Thil pawimawh ber mai chu foetus (nau insiam) chauh a ni lo, nunna nei a ni a. Piang se chuan pawn lamah dam khawchhuak thei a ni tlat,” tiin a sawi bawk a.
Judge pahnihte thutlukna a inanloh hnuah three-judge bench Chief Justice of India kaihhruai chuan a ngaihtuah zui ta a ni. Chief Justice chuan na tak maiin petitioner chu ‘nausen lungphu titawp tura thupek’ pe turin a duh takzet em tiin zawhna a zawt bawk a.
Petitioner fa dang pahnih lai nei tawh chuan depression a neih thu sawiin rilru lam leh sum lam thleng pawhin fa pathumna enkawl tlak a ni tawh lo tiin a sawi.
October 9 khan Supreme Court chuan nautihtlak remtihna a pe a, a hnuah erawh centre chuan AIIMS Delhi-a doctor te thurawn angin thupek hnukkirin doctor rual te chuan nautihtlak chu an remti lo a, a chhan ber pawh foetus chuan nunna a nei tawh an tih vang a ni.
Justice Hima Kohli chuan court in ‘foestus lungphu a titawp thei’ a tih laiin a judge pui Justice BV Nagarathna chuan pawm lo thungin court chuan hmeichhe thutlukna chu zah tur a ni a ti thung.
“Petitioner tumruhzia ka hriatin hmeichhia thultukna chu zah tur a ni. He thil hi chu nausen la piang lo aiin petitioner tana tha chu ngaih pawimawh zawk tur a ni em tih leh engtin nge inbuktawk takin kan kalpui ang tih chu a ni,” tiin Justice Nagarathna chuan a sawi bawk.
Hearing neihnaah court chuan duhthlan tur awm pakhat chu naupang chu piantira sorkarin a enkawl mai a nia ti a. Court chuan hmeichhia chu kar rei lo te la nghaka nau neih pangngaia a neih hun a nghak thei ang em tiin a zawt bawk a.
Court chuan tuna thutlukna siam zung zung se foestus chu a tichhe thei tia sawiin, “Nausen chu pianken dik lovin piang se la, tute mahin an adopt duh lo thei,” tiin Chief Justice chuan a sawi bawk.
Hmeichhia nau tihtlak duh chuan an rethei thu leh lehkhathiam lo a nih thu a sawi a. Bench chuan a pawmsak duh lo thung a.
“Foestus chu nu pum chhungah a awm rih a tha ber a, chu chu khuarel thil a ni a. In client hian eng nge a duh, vawiin hian min chhuah zalen rawh u a ti tihna a ni em? Mithiamte chuan tunah foestus hi kan la chhuak a nih chuan a felhlel hlen dawn a ti a ni,” tiin Justice JB Pardiwala chuan a sawi bawk a.
Hmeichhe counsel chuan hmeichhia chu pasal nei lo chu ni se foeticide-ah zawhna a awm lo mai thei a ti bawk a. “Chu chu thil pawimawh a ni lo em ni?” tiin Chief Justice chuan a zawt bawk a. Counsel-in Delhi High Court thulukna sawia kar 29 rai lai nau tihtlak a remtihna a sawi chu Chief Justice chuan, “Keini chu Supreme Court kan nia,” tiin a chhang thung a ni.
Centre aiawha ding Additional Soilictor General Asihwarya Bhati chuan petitioner counsel chuan nautihtlak chungchangah pawngsual tawkin in ngenna a neih te sawilanna a nei a. “Petitioner chu rape survivor a ni a. Kum tling lo a ni bawk a, kar 26 chhung eng nge a tih” tiin a sawi thung a.
Court chuan hmeichhe aiawh leh centre aiawhte chu hearing neih hmaa inkawmna nei turin a ti zui thung a ni.