NBA – LA Lakers an chak

Ningani zing khan NBA Regular season khelh chhunzawm a ni a, inkhel hmuhnawm takah Los Angeles Lakers chuan San Antonio Spurs an hneh. Vawi thum an tlawm zawn hnua an chak leh theih nan LA Lakers tan LeBron James a thawhhlawk viau a, triple-double a puitlin. Lakers an chak lai hian a zawna a vawi thum nan Golden State Warriors an tlawm ve thung.
LA Lakers hi San Antonio Spurs lakah an khel tha viau a, quarter paliah chungnung zawk an ni vek. Quarter hmasa berah point kua laiin an chungnung nghal. Quarter hnihnaah point hnihin an chungnung zui leh a, point 11 a hmahruai chungin chawlhlawk an hmang.
Chawlhlawk hmain khelh chhe viau mah se Spurs hi an insiamtha thei chuang lo. Quarter thumnaah point liin LA Lakers an chungnung zui leh a, quarter hnuhnung berah point thuma chungnung zui lehin an khingpuite hi point 119-101 in an hneh a, vawi thum an tlawm zawn hnuah an chak ve leh ta a ni.
San Antonio Spurs an hneh tum hian LA Lakers tan LeBron James chuan point 16 a thawkchhuak a, assist vawi 11 a neih bakah ball sawhlet vawi 10 dawng tling bawkin triple-double a puitlin a. Hei hi season kal mekah triple-double a puitlin vawi rukna a ni. Lakers tan hian player pasarih ngawtin point 10 chin an thawkchhuak a, point thawkchhuak hnem ber chu point 20 thawkchhuaktu Dalton Knecht a ni a. San Antonio Spurs tana point thawkchhuak hnem ber Victor Wembanyama chuan point 20 a thawkchhuak ve bawk.
Vawi thum tlawm zawn tawh LA Lakers an chak laiin vawi hnih tlawm zawn tawh Golden State Warriors chu an mualah ngei an tlawm leh thung. Warriors hian an mualah Oklahoma City Thunder an hmachhawn a, an player pawimawh Stephen Curry tel lova inlan an nih bawk vangin an mualah 101-105 in uiawm takin an tlawm.
Inkhel Salt Lake City-a inkhel hmuhnawm takah Denver Nuggets chuan an khingpui Utah Jazz chu point 122-103 in an hneh. He inkhelah hian Nikola Jokic chuan point 30 a thawhchhuah bakah ball sawhlet vawi 10 a dawng tling bawk. Inkhel dangah Eastern Conference hmruaitu Cleveland Cavaliers chu season tharah an muala an tlawm vawi khatna hun an tawng a, an mikhual Atlanta Hawks chu point 135-124 in an hneh lo. He inkhelah hian Trae Young chuan point 20 a thawkchhuak a, assist vawi 22 zet neiin hei hi NBA-a assist a neih tam ber a ni nghe nghe a ni.