1 Mizo Air Squadron ami, National Cadet Corps (NCC) cadet pahnih chu kumin NCC Republic Day Camp 2023 intihsiakah an hlawhtlin avangin larsap Hari Babu Kambhampati chuan Thawhtanni khan Raj Bhavan-ah a chawimawi.
-- Advertisement --
Pachhung University College-a zirlai, corporal Kenny Lalrinawma Singh leh corporal Laltlansangi, 1 Mizo Air Squadron NCC cadet-te hi Republic Day Camp 2023-a tel tura thlan zingah lawmman dawng thei awmchhun an ni a. Corporal Kenny Lalrinawma Singh hian Directorate General NCC Medal a dawn bakah Cultural (Group Song) intihsiakah pakhatna a ni. Corporal Laltlansangi hi Prime Minister Rally(Cultural) leh NCC cadet-te tana drill pawimawh ber zing ami, ‘line area’ ah a tel phak a ni.
Larsap-in a chawimawinaah hian NCC Silchar Group commander Brigadier Arun Uniyal bakah 1 Mizo Air squadron commanding officer, squadron leader MK Singh, warrant officer HZK Vanlalsawma leh official dangten an tawiawm a ni.
Larsap chuan NCC cadet-te hlawhtlinna hian Mizo thalai tam tak a chawh phur a beisei tih a sawi a. Mizo thalai zingah officer leh sipai pangngai anga Indian Armed Forces zawmtu an pun zel theih nan NCC hotute chu zirtirna uar turin a chah.
Kumin January 2 khan 74th National Cadet Corps Republic Day Camp hi Cariappa Parade Ground, Delhi Cantt-ah neih tan a ni a, thla khat chhung neih a ni. He Camp hi NCC cadet-te tana program pawimawh ber pakhat a ni a. Kuminah hian India thiantha ram 19 atangin thalai rawn tel bawkin, cadet 2155 an awm a, chu’ng zinga 710 chu hmeichhia an ni. India hmarchhak atangin cadet 120 an tel.