Mizoram sawrkarin Asian Development Bank (ADB) atanga loan cheng vaibelchhe 1008 a puk tumnaah tih tur tulte tihfel sak thuai turin Health minister Dr R Lalthangliana chuan a ngen.
-- Advertisement --
Loan puk tum chungchanga Mizorama rawn zin ADB hotu – Health specialist & Team Mission leader Nishant Jain leh health specialist & Team Mission co-leader Dai-Ling Chen te chuan Thawhtanni khan a pisa-ah Health & Family Welfare minister Dr R Lalthangliana hi an kawm a. Nikum June-a ADB loan pukna tur sawrkar laipui Ministry of Finance-in Mizoram a lo pawmpui tawh bawhzui leh chak zawka hmalak dan tur an sawi ho.
Minister hian ADB chu kalphung fel tak nei leh uluk taka thil an kalpui dan a hriatpui rualin, Mizoramin suma harsatna a tawh avanga loan agreement tihfelsak thuai turin a ngen. Loan tihfel thuai a nih theih nan thla khata vawi khat emaw lo zin a, Health department official-te nena sawiho tha a tih thu a lo hrilh a. ADB hotute hian minister ngenna chu an ngaihpawimawh thu leh theihtawp chhuaha hma an lak tur thu an sawi.
Kum 2009 khan ADB atangin Mizoram sawrkar hian loan a lo puk tawh avangin thil thar a ni lo a, tun tuma Mizoram sawrkar dinhmun hriaa ADB leh Ministry of Finance ten puih an tum chu thil lawmawm tak a ni tih Dr R Lalthangliana hian a sawi.
ADB hotute hian chief secretary leh Finance department hotute an la kawm leh dawn a ni.