NCERT syllabus atanga Mughals paihin inhnialna siam

Indian school textbook atanga Mughal ruler te ziahna chapter paih chuan inhnialna nasa tak siamin naupang zirlaite hnenah engtiangin nge history zirtir tur tih chu sawihona luahtu a ni.
Tun hnaiah India sorkar hnuaia awm National Council of Educational Research and Training (NCERT) chuan syllabus a siam danglam a, chutah chuan Mughal ruler te chanchin an paih a. An thlak danglam zingah Mahatma Gandhi thihna chungchang leh 2002 Gujarat state riot te pawh paih zingah a tel.
NCERT te chuan syllabus an thlak danglam hi nikuma an puan tawh kha niin ‘rationalisation’ exercise tiin an sawi a, zirlaite knowledge a khawih danglam loh tur thu leh Covid-19 pandemic zawh hnua zirlaite puhrrit a chhawk zangkhai zawk dawn a ti thung.
Mahse a bik takin Mughal dynasty kaihhnawih paih chuan selna siamin NCERT te chu Hindu right-wing tena kum tam tak paih tura an nawra an duhna te tihlawhtlingah puhin India history pawimawh tak an hnawl an ti ve thung.
“Zirlaite hian nation’s history an zir a. Thil duhawm lo nia ngaih te leh remchanglo nia ngaihte kan paih bo sak hian ‘critical thinking’ an neih theihna tur kan paihsak a ni” tiin Hilal Ahmed, political Islam zirtirtu leh Centre for the Study of Developing Societies-a thawk chuan a sawi.
A thlawptute lam thung chuan school history textbook-ah siam danglam ngai a awm a lawm, Muslim ruler te dah pawimawh a ni lutuk an ti ve thung a.
“Mughal rorel lai kha Indian history a thisen chhuah nasat ber lai a ni” tiin Makhan Lal, historian leh academician NCERT textbook ziaktu zinga mi chuan a sawi a.
“Munghal te ai chuan Vijay Nagar empire emaw Cholas emaw Pandyas te kan ziak tam thei zawk lo em ni?” tiin zawhna a siam a. Heng a sawi te hi southern India-a Hindu dynasty ruler te an ni.
Midangte erawh chuan India tunhma hun te a nihna anga hriatthiam leh pawm duh lohna angah an ngai thung a. “Tuna thil thleng mek hian Mughal hun lai kha tharum thawhna nasa bikah an chhuah a ni. A nihna takah erawh khawi hmunah pawh lal rorelna hnuaiah chuan tharum thawhna chu tel vek a ni zawk a. Tunah erawh Muslim te chu Hindus te tiduhdahtu angah an chhuah bik a ni” tin historian leh author Manu S Pillai chuan a sawi thung.
NCERT director Dinesh Saklani chuan an curriculum chungchanga inhnialna chu ‘tul hauh lo’ tiin a sawi thung a, Mughals te chungchang chu school naupangte hnenah zirtir reng an la ni a ti thung a.
History curriculum ennawn fo hi thil thar a ni lo va, sorkar hrang hrang hnuaiah neih tawh thin a ni. Tuna ennawn pawh hi scholars tena a content leh chuta zirchhuah theih te inbuk zawk theih nana an rawt tia sawi a ni a. “History a tawp ngai lo, tawp chin nei lo leh chinfel zawh theih loh a ni a, hei vang hian history textbook te chu ennawn fo ngai a ni reng a ni,” tin Ahmed chuan a sawi.
Ahmed chuan tuna zirlaibu atanga paih chungchangah zir thiamna kaihhnawih lama inhnialna nasa zawk a siam lo thei lo a ti thung a. A chhan ber pawh history a ni a, tia sawiin dynasty piah lamah leh indona piah lamah administration, governance, a hunlai culture te en tel vek a ni. Chungte chu society hriatfiah a nih theih nana pawimawh an ni si a ni, a ti a.
“Chuvangin thleibik nei tak emaw a paih i nei a nih chuan a context pum paihin i tikhawbaw thei a ni,” tiin Prof Ahmed chuan a sawi bawk a. Tuna CBSE-in a paih tak hi Class 12 textbook a ‘Kings and Chronicles: The Mughal Courts’ tih a ni.
Phek 30 laia chhah niin Mughal court hnathawh dan te ziahna a ni a. Mughal emperor te hnathawh dan te tarlanna niin Mughal chronicles hmang hian lal ram hnuaia hnam leh sakhaw hrang hrang – Hindus, Jains, Zoroastrians leh Muslims te chungchang a ziak a ni.
Chapter paihbo a hnawl chu a pawi lo tiin Lal chuan sawi thung ‘historical value a nei lo’ a ti bawk a. “Chapter khat chauh a ni hrim hrim a, curriculum pum atangin Mughals hnawl vek tihna pawh a ni lo” tiin a sawi bawk a.
Indian textbook te chuan Mughal ruler te nunrawn dan kha an hmaih zawk fo, Hindu king te aiin an dah pawimawh zawk thin a. He thil dik lo tak avang hian kum sawm tam chu ancient Indian culture leh values te zahpuina a awm tiin Lal chuan a sawi bawk a. “Mahse, tunah chuan tun hma hun te nena inzawmna lam ngaihtuahna a nasa tak a ni” tiin a sawi bawk.
Pillai thung chuan history te chu inelna anga kalpui chi a ni lo a ti a, mahse, tuna kalpui dana dah chungnun tumna ang chi chuan politics leh mipui rilruah beh nghehtir duhna a thlen thei a ti a. “History of India sawiin Hindu tihlen duhna a awm a, Hindu figure te lehlama dahkhawm a, a lehlamah Mughal te sual anga lantir tumna a awm,” tiin a sawi bawk.
Nunrawnna chungchangah chuan Pillai chuan Mughals te chauh an ni lo hmanlaia lal te kha an mite lakah an nunrawng tlangpui a, chu chuan kum zabi 19 thleng khan a la chhawm lut zel zawk a ti bawk.
Pillai chuan Mughals te chuan a nawlpui rilru an luah zui zel theihna chu an tun hnai deuh ber vang a ti bawk a. Mughal emperor hnuhnung ber kha Gandhi-a pian hma kum sawm tel hma lawka mi mai a ni a, Mughal emperor te hmuh theiha an la awm laiin Indian nationalist Dadabhai Naroji te kha chu an puitling hman a ti bawk a.
Hei vang hian Mughals te chanchin kan hre tam a, an tun hnai em vang a ni a, Cholas te kha chu kum zabi 13 ah hnehin an awm daih tawh tlat a ni, a ti bawk.
Ahmed chuan Indian history colonial view thlirnaa thlira tun hma hun chu Hindu hun ang leh medieval hunlai chu Muslim hun anga sawina chu a fuh lo a ti a. “India culture leh religion te chu insider v outsider debate ang lekah chhuah a ni a, chutiang maia awlsam a ni lo,” tiin a sawi a.
History a duh lai bik hnawl a nih palh chuan chu chuan formal education-ah ruak a siam thei tia sawiin, “Chutiang a nih chuan thil danglam daih zirchhuah a nih phah thei” tiin a sawi bawk.