ndian wrestling buai zual zel

Wrestling Federation of India (WFI) buaina chuan ziaawm lam a la pan thei lo a, a hun taka inthlan an huaihawt theih loh avangin Nilaini zan khan khawvela wrestling thuneitu sang ber United World Wrestling (UWW) chuan WFI chu an pawl member a nihna a hlih-sak (suspend) leh ta a, hremna hi hlih hman a nih loh chuan Septem-ber 16 atanga Olympic-qualifying Wrestling World Championships leh September ni 23 atanga Hangzhou-a tan tur Asian Games lamah Indian wrestler-te’n In-dia flag hnuaiah intih-siak an hmachhawn thei dawn lo!
Indian wrestling buaina bulpui chu an president ni thin, BJP MP ni bawk Brij Bhushan Sharan Singh-a’n hur-sualna lam hawia wrest-ler hmeichhiate a khawih thin nia puhna vang leh bang tura an nawr pawha a ban duh tlat loh vang te, lung in lama nawrluh ngei tuma wrestler-te’n thla tam an bei chung pawha a tan hleih theih loh vangte kha a ni ber.
A thlaa thla tel Indian wrestler-te’n an president ban leh hrem phuta nawrh an huaihawt avangin kumin hian United World Wrestling chuan tum hnih lai Wrestling Federation of India hi an member a nihna atangin a lo suspend tawh a; tunah chuan Indian Olympic Association (IOA)-in WFI hi thiatin ad-hoc panel a enkawltir a, Bhupender Singh Bajwa chu Indian wrsestling lo enkawl lailawk tura ruat a ni a, a ho hian ni 45 chhunga inthlan hruaihawt tura tih an nih laiin an inthlang rthei ta chuang lo a, suspend bawk an tawk leh ta a ni.
Wrestling inelna lian pahnih hmachhawn hmabak an nih avangin suspend hun hi a fuh lo zual ta a, hremna hlih hman a nih loh chuan nakum Paris Olympic Games-a tel tur zawnna ni nghal World Cham-pionship leh Asian Games-ah hian Indian wrestler-te chu ‘neutral athletes’ anga an inlan a ngai dawn a ni.
Tarlan tak angin, IOA chuan kumin April ni 27 khan WFI chu thiatin ad-hoc panel a din a, he committee hi ni 45 chhunga inthlang tura tih niin, April ni 28 khan UWW pawhin hun tiam chhunga inthlan an buat-saih hman loh chuan Indian federation chu suspend lehah a vau a, tun hi an thleng ta a ni.
Wrestling Federation of India president atanga an petchhuah tak Brij Bhushan Sharan Singh lakah Delhi Police-te chuan Indian wrestler hmeichhiate hursualna lam hawia khawih thu-buai pahnih an ziaklut a, pakhat phei chu kum tling lo khawih thubuai (POCSO Act) hnuaia ziahluh a ni nghe nghe.
An president laka lungawi lohna lantirin Indian wrestler langsar pathum – Bajrang Punia, Vinesh Phogat leh Sakshi Malik-te chuan an medal awrhte Ganga luia paih tumin kumin May ni 30 khan Haridwar an thleng a, mahse, India tana an medal sualchhuah hraw tak takte chu paih loin ruahmanna dang an nei leh ta zawk a ni.