NEP hi mi tin pawm, ram pum kalpui ti

National Education Policy (NEP) mi tinin pawmin ram pumin kalpui turin hma an la mek a, a hmaa NEPs dangte ideological links neia sawisel thin ang lo takin pawm a ni, tiin Union Home Minister Amit Shah chuan a sawi.
Central University of Gujarat 4th convocation a thusawina a neihah Shah chuan NEP 2020 chuan ngaihtuahna zim kalsanin zirna tha zawk a thlen ang tia sawiin zirtirtute pawhin a nghawng te hrethiam turin an zirchiang tur a ni a ti bawk a.
“A tlangpuiin, educational policy siam tawh te chuan sel a hlawh thin a. Tun hmain NEPs pahnih a awm tawh a, chungte chu sawisel hlawh em em ve ve an ni a. Educational reforms kalpui a nih theih hmain commission tam tak siam a ni tawh thin a, chung te chuan sel a hlawh em em vek,” tiin Shah chuan a sawi a.
Chung kaihnawih te chu sawiin vanduaithlak takin education policy leh ideology te thlunzawm kan ching tlata kan ideology te kalpui nana hman kan tum thin tiin a sawi bawk.
“Mahse, Narendra Modiji-an kum 2022-a education policy a kalpui chuan sel a hlawh ve lo. Society pumpuiin an pawm a, ram puma kalpui turin hmalak mup mup a ni,” tiin a sawi bawk.
Shah chuan zirtirtute chu New Education Policy chu zirchiang tura ngenin a nghawng leh kalzel dan tur chu an hriatfiah a ngai a ti bawk a.
Education policy chu Indian education te ngaihtuahna zim tak ata tifihlim tur leh zirlai te an naupan lai atanga an zirna tawp thenga platform tha petu tur tiin a sawi bawk a.
“Zirnain a tum ber chu mihring famkima siam a ni a, he NEP hian duhthlan tur a pe dawn a ni. He new education policy hi chuan khua leh tui te chu natioal pride nei mai bakah khawvel thatna duhna a thensak dawn,” tiin a sawi bawk.
Shah chuan zirlaite chu India-in kum 25 hnu lawka kum za independence a lawm mai turah ram tana kawng khat tala thawk tura intiamna siam turin a ngen a.
“Mipu 130 crore tena thutiam kan neih vek chuan chu chu ram tiropui turin a tawk em em a ni. Mipui 130 crore in ke an pen chuan ramin 130 crore-in hma a sawn tihna a ni mai,” tiin Home Minister chuan a sawi bawk.
Modi sorkar hnuaiah hna tautet siam niin start-up policy hmangin kum 2016-17 a start-up 724 atangin kum 2022-ah chuan 70,000 an kai hman a ti a. Indian sart-up 107 ai chu unicorn an tling pha tia sawi bawkin, patent application pawh kum 2014-a 3,000 atangin kum 2021-22 ah chuan 1.5 lakh-ah a kai chho tiin a sawi bawk a. Patent pek 24,000 atangin 23,000 chu mimal hnena pek a ni, tiin Shah chuan a sawi bawk.