West Bengal Chief Minister Mamata Banerjee chuan BJP te chuan issue pawimawh te lak ata rilru lakpen nana Congress leader Rahul Gandhi chu tun hnaia UK a zina a thusawite hmangin ‘hero’ a siam tum tiin a puh.
Senior TMC leader Banerjee chuan Congress te chuan BJP te an dona kawngah an hlawhchham tia sawiin West Bengal-ah phei chuan BJP leh Congress-te chuan a ruka inzawmna an nei tiin a sawi bawk.
“Kan party supremo chuan internal meeting kan neihnaah BJP te chuan Parliament proceeding kalpui thei lova siamin Rahul Gandhi chu hero a chhuah an tum a. BJP tena hetia an tihna chhan chu opposition party dang ten mipui kaihhnawih thil pawimawh an sawi lan theih loh nana an tih a ni. Rahul Gandhi chu opposition camp lama hero ang chhuah an tum vang a ti a ni,” tiin TMC Mushidabad district chairman leh MP Abu Taher chuan a sawi.
Tun hnaia UK-a Rahul Gandhi zina thusawina a neiha a thusawi te duh lohna avangin Parliament chu rorel thei lova siamin a awm zui zel a, budget session thawh hnihnaah a tir ni nga chhung chu rorelna kalpui theih lohin a awm tawh a ni.
TMC supremo hian a hma pawhin Rahul Gandhi chu lo bei tawhin leh Lok Sabha inthlan India in a hmachhawn turah Congress leh BJP te chu an thawhpui loh tur thu sawiin kum 2024 Lok Sabha inthlanah chuan regional party dang te nen an thawhho tur thu a sawi bawk a.
TMC te chuan Congress chu Opposition ‘Big Boss’ an ni lo tia sawi bawkin Taher chuan tun hnaia Sagardishi by-poll a Congress tena TMC seat an chhuhsak chungchangah Banerjee chuan ‘Congress-CPI(M)-BJP te a ruka thawhho vang’ a ti bawk a.
“Mamata chuan he thawhhona hi Panchayat leh Lok Sabha poll neih turah kan tukzal a ngai a ni a ti a. Hei vang hian party mi leh sa te chu inlungruala chet la turin min ngen a ni,” tiin Taher chuan a sawi bawk.
Taher chuan Banerjee chuan Congress state president Adhir Chowdhury hming lam chuang si lovin BJP te nena inhrethiama chet la angah a ngai a ti a. By-poll result chuan Banerjee tilungni thei ngang lovin hei vang hian nakin zelah Congress te nena thawhho tawh loh a titlu tiin a sawi bawk.
-- Advertisement --
Congress ten chhang ler
Congress MP Adhir Ranjan Chowdhury chuan West Bengal Chief Minister Mamata Banerjee leh Prime Minister Narendra Modi te chuan, “Rahul Gandhi leh Congress hmel tihbalh an tum,” tiin a sawi.
Chowdhury chuan, “Mamata Banerjee hian PM-in ti tura a tih angin a tawng mai a ni. PM leh Didi te hian Rahul Gandhi leh Congress hmel tihbalh an tum,” a ti bawk a.
“Mamata hian ED-CBI raids lakah him a tum a, chuvang chuan a nia Congress a do vak vak a, chu chu PM Modi a tihlawm theih dan tur a nih vang a ni,” tiin a sawi bawk.