Nepal-in PM lailawk a nei ta, political party lianten parliament tun din leh an duh

Nepal-in PM lailawk a nei ta, political party lianten parliament tun din leh an duh
Nepal-a political party liante chuan an president hnenah mipuiin ei ruk duh lohna lian tak an lantir hnuah parliament a thiah chu tung ding leh turin an phut.
Nepali Congress, CPN-UML leh Maoist Centre telin party pariat chuan President Ram Chandra Poudel-a hnenah parliament thiah chu dan lo a nih thu an thleng.
Poudel-a hian mipuiin an ram kaihruai lailawk tura an duh, Sushila Karki-i prime minister lailawk atana lak luh a nih hnuah a rawt angin Zirtawpni khan House of Representatives chu a thiat a, hei hi mipui pawhin an thil phut zinga pakhat a ni.
Kar liam taa social media khapa duh lohna lantir atanga intan an rama sorkar laka lungawi lohna lantirna lian takah khan mi 50 an thi a. Lungawi lohna lantirtu hruaitute nen inrawna inremna neih a nih hnuah Karki-i chu an ram hruai lailawk tura ruah a ni.
Social media khapna hi Thawhtanni zanah hlih leh nghal ni mah se mipui thinrim a kal laklawh a, Kathmandu-a parliament leh sorkar hmunte chu Thawhlehniah halin Prime Minister KP Sharma Oli-a a bân phah.
Inrinnia thuchhuah an siamah party lian pariata an hotu ber theuhten an hming an ziak a. President thutlukna siam dan chu dan lo a ni a, Nepal-in court rorel dan kalhmang a kalh niin an sawi bawk.
Parliament thiah hi zirlai hruaitu, ‘Gen Z’ protest movement-a a phu ber berte thil phut lian tak zinga mi a ni thung.
Hetih lai hian party pariatte chian lungawi lote thil phut, March hmaa inthlan that tih chu mipuiin an thlan chhuahte kaihhruaina hnuai ngeia tih tur a nih thu an sawi.
Inrinni tlai khan President Poudel-a chuan a tute pawh zaidawha awma inthlan tha tak a awm theih nana pui turin a ngen let.
Thuchhuah a siamah, “Dan a la nung a, parliamentary system pawh a la nung a, sorkara mipui rorelna pawh a la awm reng bawk a. Thla ruk chhunga inthlan huaihawtin mipuiten mipui relna chak zawk thlan theihna hun tha an nei dawn a ni,” a ti.
Kum 73 mi, Karki-i hi Supreme Court chief justice hlui niin Himalaya tlang dung ramin hruaitu hmeichhia an neih hmasak ber a ni a, Zirtawpni khan inkhawm tawi te hmangin Kathmandu-ah lak luh a ni a, a cabinet tur pawh a ruat thuai tura ngaih a ni.
Mi tha, thil bawlhhlawha inhnamhnawih lo taka ngaih a ni a, a kaihhruai sorkar lailawk hi Gen Z movement-a zirlai hruaitute pawhin an thlawp a, sorkar lailawk kaihruai tura an duh ber a ni.
A cabinet hian hmabak ko tak erawh an nei a. Heng zingah hian dan leh thupek kenkawh that, mipuiin an tihchhiat parliament leh sorkar hmun beiha chhiate tun din, Gen Z-ten an duh ang inthlak dangman bakah mipui rorelna ram naupang taka dan ang taka thil kalpui zel a ngai dawn a ni.
A huphurhawm ber zingah tharum thawhna thlenga mawhphurtute laka hma lak dan tur chu a tel bawk.
Karki-i hi Koirala chhungkaw politics thlah kal zela an rama democratic party lian ber, Nepali Congress nen pawh thisena inhlat lo tak atanga piang a ni a. A hnuah a hun laia party hruaitu, Durga Subedi-a nen an innei zui nghe nghe.
A pasal hian dan hre mi a nih atanga kum 2016-a Nepal-a chief justice a nih theihna kawngah a puiin a thlawp tha hle tih a lo sawi tawh thin.
Hetih lai hian fel famkim a ni bik lo va, thla 11 dawn chief justice a nih chhung hian impeachment (a nihna atanga paih thlak theih a ni em tih bukna) tawngin a awm ve tho a ni.
Nepal hian kum tam tak chhunga buaina lian ber an tawn boruak daiin nun phung pawh a pangngai leh tan tawh a. Karki-i lak luh a nih hnuah Kathmandu khawlaia sipai dahte pawh an hmunah koh kir leh anni leh tawh.
Mipui thinrimna hi kar hmasaa sorkarin WhatsApp, Instagram leh Facebook tela social media platform 26 a khap atanga intan niin an rama politics-a mi langsarte rorel dan duh lohnain a zui ta a ni.
Heti taka mipui thinrimna a lan chhuah hma pawh hian ‘nepo kid’ campaign an tih, politician fate khawsak dan hautak tak tak leh an nu leh pate an ei rua puhna a lo awm tawh a, hei hi social media khap chhan pawh a ni.
Khapna hi Thawhtannia buaina a chhuah hnuah zanah hlip leh nghal mah se mipui inhawr khawm thinrim kaltluang chu an dang thei ta chuang lo a ni.