Netherlands hmaa ding tur England

Euro 2024 chu zanin hian semi-final khelh zawh a ni dawn a, ram lian pahnih; beisei phak lo pahnih ni tel bawk England leh Netherlands te an inhmachhawn dawn. Netherlands hi England in team lian an hmachhawn vawi khatna tur a ni a, BVB Stadion Dortmund-ah fiahna hautak an hmachhawn dawn.
England kal kawng
Football hmuchhuaktu nia inngai, an ram football pawl hmingah pawh Football Association ti ngat England hi Euro-ah an la champion lova, champion tumin hma lam an pan mek. Euro 2024-ah beisei phak rih lo mah se an tlang hram hram a, semi-final hial an lut tawh. Netherlands paltlanga final an lut leh a nih ngat chuan an champion kumah a puan ngam tawh hial mai thei.
Three Lions hian Euro 2024 an khelh hmasak berah Serbia chu Jude Bellingham goal thun hmangin an hneh hram a, hemi hnu hian Slovenia leh Denmark te nen an inhnehtawk a, group stage-ah chak an nei tawh lo. Beisei phak lo takin inlan mah se khelh thum atangin point 5 an hmu a, group champion an ni tho thung.
Harsa taka Group Stage an paltlang hnuin last 16-ah an tla nghal teuh hle. Slovakia lakah hun rei tak si an phurh hnuin hun pek belh tawp dawnah an sut thei hram a, minute khat chauh a awm tawh laiin tlawm an pumpelh hlauh. Slovakia lakah hian Harry Kane goal thun hmangin hnehna an chang let a, quarter-final an lut. Quarter-final-ah Switzerland an hmachhawn a, si an phur hmasa leh. An si phurh an sut hnuin penalty-ah rinkai lo zawk ni chungin hnehna an chang nawlh a, Netherlands hmachhawn turin semi-final an lut. Semi-final an thlen thlengin an ram tiat, an tiatpui anga ngaih hmachhawn an nei lova, Netherlands hi ram lian an hmachhawn hmasak ber tur a ni a, Dutch ho lakah engtiang chiaha tha nge an ni tih fiahina awm dawn.
England manager Gareth Southgate chuan Kalvin Phillips hmunruak luahtu tur a hmu zo lova, chu chu team in a tuar. Declan Rice kawppui tur a zawng kual a, player a thlak kual chhen. Rice kawppui awm mi a hmuh fuh mai theih loh vangin sawisel a hlawh phah hle. Switzerland an hmachhawn tum khan 3-4-2-1 formantion an hmang a, inelna neih meka an khelh that ber hun an tawng. Netherlands an hmachhawn hunah pawh hian 3-4-2-1 formantion bawk hi an hmang leh tura ngaih a ni.
England player te hi player lar tak tak an ni a, Jude Bellingham, Bukayo Saka, Phil Foden leh Harry Kane te hi chetha tura beisei san zual an ni. Beisei anga khel tha tumah an awm lo thung a, chu chu England buaina a ni. Heng player hming langsar tak takte hi chetha vut lo mah se an hun tha neih hlek chhawr tangkai a, team chakpui thei khawp an ni thung a, ngaihthah thiang an ni lo.
Hriatthiam har Netherlands
Player nei tha, defender nei tha tak Netherlands hi Euro 2024 khelh mekah team hriat thiam har tak an ni. Che chhia tia sawi tur an ni lova, chetha tia sawi hluai tur an ni hek lo.
Ronal Koeman-a enkawl Netherlands hian an khelh hmasak berah 2-1 in Poland an lehthal thei hram a, point thum an hmu. An khelh hnihnaah team lian France nen an inhmachhawn. Inkhel hmuhnawm takah France laka an goal thun pawmsak an ni lova, uiawm takin an chak zo lo. France nen an inhnehtawk hnuin Austria lakah an tlawm ringawt a, Group D-ah pathumna ni chungin an tlang hram.
Harsa takin group stage paltlang mah se last 16 ah an vannei a, Romani an hmachhawn. Romania lakah tha taka inlanin 3-0 ngawtin an chak. Quarter-final-ah team lian zawk pumpelhin Turkey an hmachhawn zui leh. Si an phurh hmasak zet hnuin Turkey hi own-goal hmangin an hneh let thei hram a, England hmachhawn turin semi-final an lut.
Netherlands tan Gody Gakpo a chetha viau a, goal thum a thun tawh. Gakpo a chetthat lai hian Memphis Depay-a’n beisei a phak lo. Gakpo ang thoin Xavi Simon a hmuhnawm viau bawk. An tlarhnung a phui loh vangin Virgil van Dijk leh a pawl ten sawisel hlawh mah se an insiamtha thawkhat tawh a, England lakah tawh khirh zawkin an inlan thei tura ngaih a ni. Netherlands tana channa nasa ber chu an midfielder pawimawh Frenkie de Jong inhliam hi a ni a, De Jong hmunruak luah zo an awm lo.
Head to Head
England leh Netherlands te hi inelna hrang hrangah vawi 22 an inkhel tawh a, an inthlau lo hle. Netherlands hi vawi 7 chak tawhin vawi khatin an chak tam zawk hret a, vawi ruk tlawm zawkah an tang a. Vawi ruk dang an inhnehtawk. An intum hnuhnung ber 06 Jun 2019 UEFA Nations League-ah Netherlands hian 3-1 in hnehna an chang.