Neutral-ten min la thlawp hle – Lalmuanpuia Punte

Aizawl Municipal Corporation-a hnehna sang tak an chan chhanah neutral-ten an la thlawp tha hle tih a hriat thu ZPM hruaitu Lalmuanpuia Punte chuan a sawi.
Thawhtannia an party office-a inkhawmah ZPM vice president Lalmuanpuia Punte chuan, 2010 AMC hmasa berah Congress sawrkar khan tangrualin ward 10 an la a, AMC vawi hnihna leh vawi thumnaah MNF-in ward 11 lain an sawrkar hram a. Tun tuma an hnehna thlirin a sang fal hle tih a sawi.
“Keimahni party bil chakna ni loin neutral-ten min la thlawp hle tih a hriat a. Chutiang taka min thlawp theihna tura chak taka hna thawktu chief minister leh minister-te, kawngpui tha min petu leh health care scheme tha tak min siamsaktute hi an thawh hlawk hle. Hnehna kan chan theihna atana pawimawh ber chu Pathian kan lamah a tan vang a ni a. Pathian malsawm tlakin, Pathian lamah keini party hi tang zel turin party mipui pawh kan khawsak dan fimkhur zel ang u,” a ti.
Adviser to CM (Political) Lalmuanpuia Punte hian tunhnaia HPC-D (Lalhmingthanga Sanate Faction) leh sawrkar inremna an siam dan sawizauin, kum 1994-ah sawrkar leh HPC inremin Sinlung Hills Development Council an din a. Chuta lungawi ve loten HPC-D an ti zawm a. Chumi hnu kum 2018-ah sawrkar leh HPC-D (Pu Sangbera hote) nen an inrem lehin Sinlung Hills Council an siam a. Chuta la tel ve lo tlemin kumin April 30 khan silai an rawn tung leh ta tih a sawi.
“Heng tlem la awmte hian ramri hrul khuaah inthlan dawnin mipui an la ti thlabar fo thin a, sawrkar tan chuan chu thil chuan rilru a kap ru reng a, hetianga hnam bil hminga silai keng awm tawh miah loa sawrkar leh HPC-D(LF) nen kan inrem thei hi kan lawm em em a. State ralmuang bera kan inchhal fona tih dik famkimna, a hling kan phawi kimna chiah a ni hi thil chhinchhiah tlak tak a ni,” a ti.