New Market building bula kalna zim lutuk MIMA-in siamthat duh

New Market building bula kalna
zim lutuk MIMA-in siamthat duh
Aizawl New Market building sak mek bula mipui kalna kawng zim lutuk chu hawn zau thuai an duh tih Mizoram Merchant Association (MIMA) chuan an sawi.
MIMA Gen. Hrqs. thuchhuak chuan, New Market building chhak lam mipui kalna zim lutuk, inpelh pawh harsa khawp chu an en a. Aizawl khawpui bazar-na ber heti khawpa chepa a awm rei ta lutuk chu tha lo a tiin, mipui zah lohna nia a hriat thu a sawi.
Bialtu MLA chu phone hmanga hrilh a ni a. A ni pawhin a ngaimawh thuin a lo chhang tih sawiin, hun hmasa lamah minister hoa enin, bul tan lai a ni a, mipui hliam palh hlauhthawn thuah zimte hawn a ni a. Tunah building pawh sak a ni teuh tawh chungin, contractor-in chhuanlam siam a, thil tih tlak a hlauh vang nia sawia kawng zimte hawn reng a ni chu hawn zau a hun tawh tih a sawi a ni.
‘Aizawl khawpuiah kawngkamah in an sa nasa a, fimkhur taka chet chuan inhliam palhna a awm lo tlukah kan ngai. Helai kawng hi tun October thla chhunga hawng zau ngei kan phut a. Hawn zau a nih loh chuan MIMA kaihhruaiin sumdawngten a hawn dan tur kan ngaihtuah ang,’ thuchhuah chuan a ti.
MIMA hian income tax exempt an ni chung a, Income Tax department-in online-a hriattirna pe a, tribal cerficate, income tax exemption certicate leh income tax exempt an nihna section tarlan bakah thiam anga assessment siam a, chhanna (income tax return) pek hnuah pawh notice pek nawn leh thin an ni chu Mizote hmuhsitnaah an ngai a, a ngaithiam lo takzet, tiin, ‘Income Tax hotute lehkha thawn a, chumi hnua hetiang a thleng leh zel a nih chuan law court thlenga kal nise,’ an ti.