Newcastle lakah Spurs an zawr

Pathianni zan khan English Premier League khelh chhunzawm a ni a. Top 4 huang luah inchuhna inkhel pawimawh takah Newcastle United chuan 6-1 ngawtin Tottenham Hotspurs an sawp a, United lehpelin pathumnaah an kaisang. Pathianni zana inkhel dangah West Ham in AFC Bournemouth an sawp a, dinhmun himah thut hmun an rem ve bawk.
Newcastle lakah Spurs an zawr
Table-ah palinaa awm mek Newcastle United hian St James Park-a an mikhual Tottenham lakah bul an tan tha tak zet a, minute 21 chhung lekin goal nga ngawt an thun hman. Second half tir lamah goal chhuah ve zauh bawk mah se, Callum Wilson goal hmangin an inkar an tizau nawn leh a. An hnuai chiaha awm Spurs chu chiang taka hnehin champions league khelh phak an hnaih deuh deuh zel.
Magpies hian an hnuai chiaha awm Tottenham hi an nawr nghal chat a, fuh taka ball an inpek kual hnuin Joelinton chuan tha zetin a pet a, Joelinton pet na tak hi Tottenham si nghak Hugo Lloris chuan lo dang bawk mahse ball per let leh hi Jacob Murphy chuan awlsam takin a pet goal a, minute hnihna lekah hmahruaina goal a thun.
An elpui lian lakah hma taka goal an thun hian Newcastle a fuih phur leh zual a, goal an thun belh leh thuai. Minute rukna lekah Joelinton chuan si nghak a bum tlang hnuin awlsam takin a pet goal a, an goal hnihna a thun. Inhnaih chilh taka goal an chhuah zawn vangin Tottenham an talbuai a, goal an chhuah belh leh thuai bawk. Minute kuannaah Jacob Murphy chuan Schär siamsak atangin an goal thumna a thun zui leh. Minute kaw chhung leka goal thum ngawt an thun hman vangin chak tur zawk a chiang tawk viau tawha ngaih a ni a, manager nghet nei lova awm mek Tottenham tan chak let ngaihna a awm tawh lo ang hiala ngaih a ni.
Minute 10 em pawh tling loah goal thum ngawt an thun hman vangin Magpies hi phur leh inringtawk takin an inlan chhunzawm a, chawlhlawk hmain goal hnih ngawt an thun belh zui leh cheu. Minute 19-naah Alexander Isak chuan Willock siamsak atangin an goal lina a thun a, an hmahruaina a tizau.
Goal an thun mawlh mawlh vanga Newcastle an phur lak lawh laiin insiamtha thei lovin Tottenham an talbuai chhunzawm ve thung a, goal an chhuah belh leh thuai. Mualneitu Newcastle goal lina thuntu Alexander Isak hian minute 21-na lekah Longstaff siamsak atangin an goal ngana a thun belh zui leh zat a, chawlhlawk an nih meuh chuan Tottenham hian si nga an phur hman der tawh.
Si nga zet phur tawh Tottenham hian chawlhlawk hnu lamah beiseina thar nei turin bul an tan tha a. Second-half tan atanga minute hnihna lekah Højbjerg siamsak atangin Harry Kane chuan goal a thun a, an si phurh a sut then. Tottenham tana goal thun hnem ber Kane goal vangin Spurs hian beiseina thar nei bawk mah se goal an chhuah leh thuai tho thung. Minute 67-naah Callum Wilson chuan singa faia hma an hruai nawn lehna goal a thun a. Spurs nen an inkar a tizau nawn leh. Newcastle hian goal thun theihna hun tha dang nei bawk mah se hun tawp thlengin goal an thun belh thei tawh bik lova, an mualah 6-1 ngawta hnehna changin top 4 huang an luah nghet a, pathumnaah an inhlang-kai. Newcastle United lakah dawl zawr taka an zawr vangin Tottenham in champions league khelh phak an beiseina a chuai thung.
Spurs sawptu New-castle hian khel 31 atanga point 59 hmuin pathum naa awm Man-chester United an lehpel pathumnaah an inhlang kai, United nen an point hmuh zat a intluk mek a, United ai hian vawi khatin an khel tam zawk thung. Hetihlai hian point 53 hmua panganaa awm mek Tottenham aiin vawi khatin an khel tlem zawk thung a, hei vang hian top 4 huang luah phak theihna hun tha lehzual an neih phah.
Pathianni zana inkhel dangah West Ham United chuan mualneitu AFC Bournemouth chu si li fai ngawtin an sawp a, Hammers hi 13-naah inhlang-kaiin hmun himah thut hmun an rem rih. West Ham tan hian Michail Antonio, Lucas Paquetá, Declan Rice leh Pablo Fornals ten goal khat theuh an thun a, an phu ang ngeiin point thum an hlawhchhuak. Hammers hian Europa Conference smei-final an lut tawh bawk.